اسلام آباد: وزیراعظم محمد شہباز شریف نے کہا ہے کہ میری دعا ہے کہ 2025 کا سورج ہمارے ملک پاکستان کیلئے ترقی اور خوشحالی کی نوید لے کر طلوع ہو۔

نئے سال (2025) کے آغاز پر وزیراعظم شہباز شریف نے اپنے جاری کردہ پیغام میں کہا ہے کہ نئے سال کے آغاز پر میں پوری قوم کو مبارکباد پیش کرتا ہوں، میری دعا ہے کہ نئے سال میں ہم گزشتہ سال کی اپنی انفرادی اور اجتماعی زندگیوں کی غلطیوں  کو سدھار کر ایک نئی شروعات کریں اور ایک نئے روشن مستقبل کا آغاز کریں۔

 انہوں نے کہا کہ میں دعاءگو ہوں کہ 2024 میں دنیا کو جن معاشی، سیاسی اور امن و امان کے بحرانوں کا سامنا رہا، نئے سال میں ان پر قابو پانے کیلئے مثبت پیش رفت ہو، نیا سال پاکستان سمیت پوری دنیا سے بھوک، افلاس، جنگ، دہشتگردی، جرائم، فرقہ واریت اور طبقاتی تقسیم کے خاتمے کا سال ثابت ہو۔

وزیراعظم کا کہنا تھا کہ 2024 کا سال ہمارے پیارے پاکستان کے لیے شاندار کامیابیوں کا سال تھا، 2024 کے دوران ہمارے معاشی اشار یے بہتر ہوئے، بین الاقوامی مالیاتی اداروں نے پاکستان پر اپنے اعتماد کا اظہار کیا، دوست اور برادر ممالک سے اربوں روپوں کی سرمایہ کاری کے معاہدے ہوئے اور معیشت کی ڈیجیٹائز یشن پر کام کا آغاز ہوا۔

انہوں نے کہا کہ ہم نے باضابطہ طور پر قومی اقتصادی ٹرانفارمیشن پلان “اڑان پاکستان” کا اجراء کر دیا ہے، اڑان پاکستان دراصل معیشت کو ایک نئی جہت دینے، جامع ترقی کو فروغ دینے اور پائیدار ترقی کے حصول کے لیے میری حکومت کا عزم ہے۔

شہباز شریف نے کہا کہ اب جبکہ ہم 2025 میں داخل ہوگئے ہیں اور معیشت کو خود انحصاری کی پٹری پر ڈال چکے ہیں تو آج کے دن ہم ایک مستحکم ، روشن اور خوشحال مستقبل کا عزم کرتے ہیں۔

انکا کہنا تھا کہ 2024 کا سال فلسطین میں اسرائیلی مظالم کے حوالے سے بد ترین سال رہا جس میں اسرائیلی قابض افواج نے ظلم کی وہ داستانیں رقم کیں جن کی مثال حالیہ تاریخ میں نہیں ملتی، اسی طرح بھارتی مقبوضہ جموں و کشمیر میں ہمارے مظلوم بھائی اور بہنیں بھارتی قابض افواج کی بربریت کا شکار رہے، میں امید کرتا ہوں کہ 2025 میں فلسطین اور بھارتی غیر قانونی مقبوضہ جموں و کشمیر اپنی آزادی کی جدو جہد میں کامیاب ہوں۔

2024 وزیراعظم نے کہا کہ میں ہماری بہادر سیکیورٹی فورسز نے دہشت گردوں کے خلاف کامیابیاں حاصل کیں، دہشت گردی کے خلاف اس جنگ میں ہمارے سیکیورٹی فورسز کے بہادر جوانوں نے جام شہادت نوش کیا، جن کی قربانیاں قوم تاحیات یاد رکھے گی۔

شہباز شریف نے مزید کہا کہ آئیں! نئے سال کے آغاز میں ہم یہ وعدہ کریں کہ اس ملک کو قائد اعظم اور علامہ اقبال کے پاکستان بنانے کیلئے کسی بھی قربانی سے دریغ نہیں کریں گے، یہ ملک ہماری پرکھوں کی امانت ہے، ہم اس کی حفاظت اور تعمیر و ترقی میں اپنا خون پسینہ ایک کریں گے، میں دعاگو ہوں کہ 2025 ہماری قوم کے لیے خوش قسمتی اور بے پناہ خوشیوں کا سال ہو۔