اسلام آباد: صدر مملکت آصف علی زرداری، وزیراعظم محمد شہباز شریف اور وزیر داخلہ محسن نقوی نے فتنہ الخوارج کے خلاف کامیاب آپریشن پر سیکیورٹی فورسز خراج تحسین پیش کیا ہے۔

صدر آصف علی زرداری نے شمالی وزیرستان میں کارروائی کے دوران 4 دہشت گردوں کو جہنم واصل کرنے پر سیکیورٹی فورسز کی بہادری کو سراہا اور کہا کہ فورسز دہشت گردی کے عفریت کے خاتمے کے لیے کارروائیاں کر رہی ہیں۔

انکا کہنا تھا کہ پوری قوم دہشت گردی کے خلاف متحد ہے، دہشت گردی کے مکمل خاتمے تک فتنتہ الخوارج کے خلاف کاروائیاں جاری رہیں گی۔

’’سیکیورٹی فورسز کے نڈر نوجوانوں پر فخر ہے‘‘

دوسری جانب وزیراعظم محمد شہباز شریف نے بھی شمالی وزیرستان کے علاقے سپین وام میں چار خارجیوں کو جہنم واصل کرنے پر سیکیورٹی فورسز کو خراج تحسین پیش کرتے ہوئے کہا کہ قوم کو سیکیورٹی فورسز کے نڈر نوجوانوں پر فخر ہے۔

شہباز شریف نے مزید کہا کہ انسانیت کے دشمنوں کے مذموم عزائم کو اسی طرح خاک میں ملاتے رہیں گے، حکومت اور سیکیورٹی فورسز ملک سے دہشتگردی کے مکمل سدباب کے لیے پر عزم ہیں۔

’’قوم سیکیورٹی فورسز کے شانہ بشانہ کھڑی ہے‘‘

بعدازاں وفاقی وزیرداخلہ محسن نقوی نے بھی شمالی وزیرستان میں کامیاب انٹیلیجنس بیسڈ آپریشن پر سیکیورٹی فورسز کی ستائش کی اور کہا کہ خوارجی دہشتگردوں کے خلاف مسلسل کامیاب آپریشنز پر سیکیورٹی فورسز کو خراج تحسین پیش کرتے ہیں۔

انہوں نے مزید کہا کہ دہشتگردوں کے مذموم عزائم ناکام بنانے پر سیکیورٹی فورسز کو شاباش دیتے ہیں، بہادر سیکیورٹی فورسز نے 4 دہشتگردوں کو جہنم واصل کیا اور ان کے عزائم کو خاک ملایا، قوم سیکیورٹی فورسز کے شانہ بشانہ کھڑی ہے۔