راولپنڈی: سیکیورٹی فورسز نے خیبرپختونخوا میں مختلف کارروائیاں کے دوران 10 خارجی دہشت گردوں کو جہنم واصل کردیا۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے 30 اور 31 جنوری کو خیبرپختونخوا کے مختلف علاقوں میں کارروائیاں کی جس دوران 10 خارجی دہشت گردوں کو ہلاک کیا گیا۔

ڈیرہ اسماعیل خان میں انٹیلیجنس بیسڈ آپریشن

آئی ایس پی آر نے بتایا کہ سیکیورٹی فورسز نے ڈیرہ اسماعیل خان کے علاقے کلاچی میں انٹیلیجنس بیسڈ آپریشن کیا۔

ترجمان پاک فوج کا کہنا ہے کہ سیکیورٹی فورسز نے کلاچی میں دہشت گردوں کی موجودگی کی خفیہ اطلاع پر کارروائی کی۔

پاک فوج کے شعبہ تعلقات عامہ نے کہا کہ کلاچی میں ہونے والی کارروائی میں 4 خارجی دہشت گرد مارے گئے۔

شمالی وزیرستان میں دہشت گردوں کے خلاف چار کارروائیاں

آئی ایس پی آر نے کہا کہ شمالی وزیرستان میں سیکیورٹی فورسز نے دہشت گردوں کے خلاف چار کارروائیاں کیں۔

ترجمان پاک فوج کے مطابق سیکیورٹی فورسز اور دہشت گردوں کے درمیان دتہ خیل، حسن خیل، غلام خان اور میر علی میں جھڑپیں ہوئیں۔

پاک فوج کے شعبہ تعلقات عامہ نے مزید بتایا کہ شمالی وزیرستان میں ہونے والی کارروائیوں میں 6 خارجی دہشت گرد مارے گئے جب کہ ہلاک ہونے والے خارجی دہشت گردوں کے قبضے سے ہتھیار اور گولہ بارود برآمد ہوا۔

پاک فوج کے ترجمان نے کہا کہ مارے جانے والے دہشت گرد نا صرف سیکیورٹی فورسز پر حملوں بلکہ شہریوں کے قتل میں بھی ملوث تھے۔

آئی ایس پی آر کا مزید کہنا تھا کہ علاقوں کو دہشت گردوں سے پاک کرنے کے لیے سینیٹائزیشن آپریشنز جاری ہے جب کہ پاکستان کی سیکیورٹی فورسز وطن عزیز سے دہشت گردی کی لعنت کے خاتمے کے لیے پرعزم ہیں۔