سندھ حکومت نے گرین لائن بس سروس کی منتقلی اور اورنج لائن بس سروس کے آپریشنز کی ذمہ داری اپنے حوالے کرنے پر غور کیا ہے۔

 سینئر وزیر سندھ شرجیل میمن کی زیر صدارت ہونے والے اعلیٰ سطح کے اجلاس میں یہ اہم فیصلے کیے گئے۔

شرجیل میمن نے بتایا کہ وفاقی حکومت کو جنوری میں گرین لائن منصوبہ سندھ حکومت کے حوالے کرنا تھا، اور سندھ حکومت فروری تک اس کے آپریشنز سنبھالنے کے لیے تیار ہے۔

انہوں نے مزید کہا کہ وفاقی حکومت کی جانب سے گرین لائن بس سروس کے حوالے سے مہنگے معاہدوں پر شکایات ہیں، تاہم منتقلی کے بعد سندھ حکومت اس پر دوبارہ غور کرے گی۔

شرجیل میمن کا کہنا تھا کہ گرین لائن منصوبہ کراچی کے مسافروں کے لیے ایک اہم سہولت ہے اور سندھ حکومت اس کی کارکردگی اور معیار کو مزید بہتر بنانے کے لیے پُرعزم ہے۔

ان کا کہنا تھا کہ سندھ حکومت کا مقصد ایک قابل اعتماد اور آرام دہ پبلک ٹرانسپورٹ نظام فراہم کرنا ہے اور وہ پبلک ٹرانسپورٹ کے منصوبوں کو جدید بنانے کے خواہاں ہیں۔

اجلاس میں اورنج لائن بس سروس کے آپریشنز کے حوالے سے بھی تفصیل سے تبادلہ خیال کیا گیا، جس کے بارے میں فیصلہ کیا گیا کہ اس کی ذمہ داری بھی جلد سندھ حکومت کے حوالے کی جائے گی۔