نارتھ کراچی سے مبینہ طور پر اغوا ہونے والے 7 سالہ صارم کو 8 روز گزرنے کے باوجود تاحال بازیاب نہیں کرایا جا سکا۔

بچے کی گمشدگی پر والدین اور اہلِ خانہ شدید پریشانی کا شکار ہیں، جبکہ پولیس کی جانب سے تحقیقات جاری ہیں۔

والد محسن پرویز نے میڈیا سے گفتگو کرتے ہوئے کہا کہ واقعے کے بعد ایس ایس پی سینٹرل کے دفتر کے باہر احتجاج بھی کیا گیا، لیکن اس کا کوئی نتیجہ نہیں نکلا۔

ان کا کہنا تھا کہ معاملہ ابتدائی دو دنوں میں دب گیا اور ان کے بیٹے کی بازیابی کے لیے کوئی ٹھوس پیش رفت نظر نہیں آ رہی۔

محسن پرویز کے مطابق آج احتجاج کے دوران ایس ایس پی صاحب کی کال موصول ہوئی، جس میں انہوں نے کیس کی تفصیلات فراہم کیں۔

ایس ایس پی نے بتایا کہ کیس پر کام جاری ہے اور ہر ضلع کی پولیس اس معاملے پر مشترکہ طور پر کام کر رہی ہے۔

صارم کے والد کا کہنا تھا کہ ان کا بیٹا لاپتہ ہوئے آٹھ روز ہو چکے ہیں اور شروع دن سے کسی پر کوئی شک نہیں تھا۔ تاہم، اب کیس آگے منتقل ہو رہا ہے اور وہ دیکھ رہے ہیں کہ رپورٹ میں کیا پیش رفت سامنے آتی ہے۔

اہلِ خانہ نے حکام سے اپیل کی ہے کہ وہ معاملے کو ترجیحی بنیادوں پر دیکھیں اور صارم کی جلد از جلد بازیابی کو یقینی بنائیں۔ پولیس کا کہنا ہے کہ مختلف پہلوؤں سے تحقیقات جاری ہیں اور جلد مثبت پیش رفت متوقع ہے۔