فیڈریشن آف پاکستان چیمبرز آف کامرس اینڈ انڈسٹریز (FPCCI) کے صدر عاطف اکرام شیخ نے کہا ہے کہ ٹیکس ریٹ میں اضافے سے محصولات میں اضافہ ممکن نہیں۔

ان کا کہنا تھا کہ محصولات میں پائیدار اضافہ صرف ٹیکس نیٹ کو وسیع کرنے سے ہی ممکن ہے۔ انہوں نے حکومت پر زور دیا کہ وہ معاشی اشاریوں کو بہتر بنانے کے لیے کاروباری برادری کے ساتھ قریبی تعاون کرے۔

عاطف اکرام شیخ نے کہا کہ برآمدی صنعت ملک کے لیے غیر ملکی زرمبادلہ کمانے میں کلیدی کردار ادا کرتی ہے، تاہم اس شعبے کو ترقی دینے کے لیے حکومتی مراعات اور مستقل رابطہ ضروری ہے۔

انہوں نے تجویز دی کہ آئندہ مالی سال کے بجٹ میں کسٹم ڈیوٹیز اور اضافی کسٹم ڈیوٹیز میں کمی کی جائے تاکہ برآمدی صنعت کو درپیش مشکلات کم کی جا سکیں۔

انہوں نے مزید کہا کہ اگر حکومت اور برآمد کنندگان مل کر کام کریں تو برآمدات کو 60 ارب ڈالر تک لے جایا جا سکتا ہے۔

انہوں نے آئندہ دس سالوں میں برآمدات کو 100 ارب ڈالر تک بڑھانے کے عزم کا اظہار کیا اور کہا کہ یہ ہدف یقینی طور پر حاصل کیا جا سکتا ہے۔

عاطف اکرام شیخ نے اس بات پر زور دیا کہ ملکی معیشت کو مستحکم کرنے کے لیے حکومت کو کاروباری برادری کی تجاویز کو اہمیت دینی چاہیے اور برآمدی شعبے کو درپیش چیلنجز کے حل کے لیے ٹھوس اقدامات کرنے چاہیے۔