حکومتِ سندھ کی ترجمان اور ایم پی اے سعدیہ جاوید نے وزیر اعلیٰ سندھ مراد علی شاہ کے خلاف کی جانے والی ہرزہ سرائی پر شدید ردعمل ظاہر کیا ہے۔

سعدیہ جاوید نے کہا کہ کسی خوشامدی سے رٹا لگائی بات کہلوانے سے زمین حقائق تبدیل نہیں کیے جاسکتے اور اس بات کو ایک چاپلوس کی بات قرار دیا، جو تاجر کمیونٹی کے بیانیے کے طور پر پیش کی جا رہی ہے۔

انہوں نے مزید کہا کہ ایک باشعور و باوقار تاجر کمیونٹی کا بیانیہ قرار دینا بد دیانتی ہے اور کوئی سنجیدہ سیاستدان یا ذمہ دار وزیر اپنے سامنے ایسی فضول بات کو برداشت نہیں کرتا۔

سعدیہ جاوید نے الزام عائد کیا کہ تاجروں کا ایک مخصوص ٹولا سندھ کے عوام کے مینڈیٹ کی توہین کر رہا ہے اور مختلف فورمز پر بزنس کے علاوہ ہر موضوع پر بات کرتا ہے۔

سعدیہ جاوید نے اپنے بیان میں جمہوریت کی اہمیت کو اجاگر کرتے ہوئے کہا کہ جمہوریت شطرنج نہیں ہے جہاں کسی بھی مہرے کو ایک جگہ سے اُٹھا کے دوسری جگہ رکھ دیا جائے۔ انہوں نے وضاحت کی کہ سندھ میں عوام کے منتخب نمائندے ہی عوام کی نمائندگی کر رہے ہیں۔

وزیر اعلیٰ سندھ مراد علی شاہ کی قیادت میں سندھ کو تاجر دوست صوبہ قرار دیتے ہوئے سعدیہ جاوید نے کہا کہ سندھ میں پبلک پرائیویٹ پارٹنرشپ کے تحت درجنوں منصوبے تمام صوبوں اور خطے کے لیے رول ماڈل ہیں۔ انہوں نے کہا کہ سندھ کی عوامی حکومت اور تاجر برادری اپنے صوبے اور ملک کی خوشحالی کے لیے ایک پیج پر ہیں۔

سعدیہ جاوید نے وزیر اعلیٰ سندھ کے خلاف متنازعہ نہروں کے معاملے پر کی جانے والی بے تکی باتوں کا بھی سختی سے جواب دیا۔ انہوں نے کہا کہ پیپلز پارٹی متنازعہ نہروں اور دریائے سندھ کے معاملے پر پیچھے نہیں ہٹے گی۔