سندھ حکومت نے ماحول دوست ای وی (الیکٹرک وہیکل) ٹیکسی سروس کے آغاز کے لیے اپنی کوششیں تیز کر دی ہیں۔

اس حوالے سے 24 گھنٹوں کے دوران محکمہ ٹرانسپورٹ کا ایک اور اہم اجلاس منعقد ہوا۔ اجلاس میں چارجنگ اسٹیشنز کے قیام کو جلد عملی جامہ پہنانے کا فیصلہ کیا گیا۔

اجلاس کی صدارت سندھ کے سینئر وزیر شرجیل انعام میمن اور صوبائی وزیر سید ناصر حسین شاہ نے کی۔

اجلاس میں سیکریٹری منصوبہ بندی و ترقی نجم شاہ، سیکریٹری ٹرانسپورٹ اسد ضامن، سندھ ماس ٹرانزٹ اتھارٹی کے ایم ڈی کمال دایو، پیپلز بس سروس کے پروجیکٹ ڈائریکٹر صہیب شفیق اور دیگر اعلیٰ حکام نے شرکت کی۔

حکام نے وزراء کو ای وی ٹیکسی سروس کے آپریشنل ماڈل، فوائد اور مسافروں کے لیے اس کی اقتصادی افادیت پر بریفنگ دی۔

بریفنگ میں بتایا گیا کہ ای وی ٹیکسی سروس کے ذریعے مسافر 200 کلومیٹر کا سفر صرف 1800 روپے میں کر سکیں گے، جو کہ ایک ماحول دوست اور اقتصادی ٹرانسپورٹ حل ہے۔

سینئر وزیر شرجیل انعام میمن نے ہدایت دی کہ ای وی ٹیکسیوں کی پہلی کھیپ فروری تک شروع کی جائے۔

انہوں نے متعلقہ محکموں کو ای وی چارجنگ اسٹیشنز سمیت بنیادی ڈھانچے کی بروقت تکمیل یقینی بنانے کی ہدایت دی۔

ان کا کہنا تھا کہ یہ منصوبہ سندھ کے ٹرانسپورٹ سسٹم میں انقلابی تبدیلیاں لائے گا اور یہ ایک جدید اور پائیدار ٹرانسپورٹ سسٹم کے قیام کے لیے ہمارے وژن کے عین مطابق ہے۔

وزیر بلدیات سید ناصر حسین شاہ نے کہا کہ حکومت سندھ کا مقصد ایک جامع ای وی ایکو سسٹم قائم کرنا ہے، جس میں چارجنگ انفراسٹرکچر سے لے کر جدید فنانسنگ ماڈلز تک تمام سہولیات شامل ہوں۔

ان کا کہنا تھا کہ بے روزگار نوجوانوں کو بینکوں کے تعاون سے آسان اقساط پر ای وی ٹیکسیاں فراہم کی جائیں گی، تاکہ وہ خود انحصاری حاصل کر سکیں اور روشن مستقبل میں اپنا کردار ادا کر سکیں۔

اجلاس میں بے روزگار نوجوانوں کے لیے ای وی ٹیکسیوں کی فراہمی کے لیے مختلف بینکنگ ماڈلز کا بھی جائزہ لیا گیا۔ شرجیل انعام میمن نے مزید کہا کہ یہ منصوبہ نہ صرف ماحول کے تحفظ میں معاون ثابت ہوگا بلکہ سرمایہ کاری کے فروغ اور نوجوانوں کے لیے روزگار کے مواقع پیدا کرنے کا باعث بنے گا۔