اسلام آباد: وزیر اعظم شہباز شریف اور وزیر داخلہ محسن نقوی نے فتنہ الخوارج کے خلاف کامیاب آپریشن پر سیکیورٹی فورسز کی پزیرائی کی ہے۔

سیکیورٹی فورسز نے ڈیرہ اسماعیل خان میں خارجی دہشتگردوں کی موجودگی کی اطلاع پر انٹیلیجنس بیسڈ آپریشن کیا جس دوران موثر کارروائی کے نتیجے میں دہشتگردوں کا سرغنہ شفیع اللہ عرف شفیع 5 ساتھیوں سمیت مارا گیا۔

ہلاک ہونے والے دہشت گردوں کے قبضے سے بڑی مقدار میں اسلحہ اور گولہ بارود برآمد ہوا جب کہ مارے جانے والے دہشت گرد علاقے میں نہ صرف سیکیورٹی فورسز پر حملوں بلکہ شہریوں کی ٹارگٹ کلنگ میں بھی ملوث تھے۔

وزیر اعظم شہباز شریف اور وزیر داخلہ محسن نقوی نے ڈیرہ اسماعیل خان میں فتنہ الخوارج کے خلاف کامیاب آپریشن پر سیکیورٹی فورسز کی پزیرائی کی۔

وزیر اعظم کی پذیرائی

وزیرِ اعظم محمد شہباز شریف نے کامیاب آپریشن پر سیکیورٹی فورسز کے افسران و اہلکاروں کی پزیرائی کرتے ہوئے خارجی سرغنہ سمیت 5 خارجیوں کو جہنم واصل کرنے پر آپریشن میں شریک افسران و اہلکاروں کی پیشہ ورانہ صلاحیتیوں کی بھی تعریف کی۔

وزیرِ اعظم نے کہا کہ دہشتگردی کی عفریت کے ملک سے مکمل خاتمے تک اس کے خلاف جنگ جاری رکھیں گے، دہشتگردی کے خلاف جنگ میں پوری قوم اپنی بہادر فورسز کے شانہ بشانہ کھڑی ہے۔

وزیرِ اعظم مزید کہتے ہیں کہ مجھ سمیت پوری قوم اپنی جان کی پرواہ کیے بغیر ملک دشمنوں کے خلاف جنگ میں شریک سیکیورٹی فورسز کو خراج تحسین پیش کرتی ہے۔

محسن نقوی کا خراج تحسین

وفاقی وزیرداخلہ محسن نقوی نے خارجی دہشت گردوں کے خلاف کامیاب آپریشن پر سکیورٹی فورسز کو خراج تحسین کرتے ہوئے کہا کہ 5 خوارجی دہشت گردوں کو جہنم واصل کرنے پر سکیورٹی فورسز کو شاباش دیتے ہیں۔

محسن نقوی کہتے ہیں کہ پاکستان کی بہادر سیکیورٹی فورسز نے بروقت آپریشن کرکے خوارجی دہشت گردوں کے مذموم عزائم کو خاک میں ملایا، بہادر سکیورٹی فورسز پر قوم کو ناز ہے۔

انہوں نے مزید کہا کہ سیکیورٹی فورسز نے خارجی دہشت گردوں کے خلاف نمایاں کامیابیاں سمیٹی ہیں۔ پاکستان کے عوام سکیورٹی فورسز کے ساتھ کھڑے ہیں اور سیکیورٹی فورسز کی کامیابیوں کو قوم تحسین کی نگاہ سے دیکھتی ہے۔