آرمی چیف جنرل سید عاصم منیر نے پشاور کا دورہ کیا، جہاں انہیں خیبر پختونخوا میں جاری انسدادِ دہشت گردی آپریشنز پر تفصیلی بریفنگ دی گئی۔

پاک فوج کے شعبہ تعلقات عامہ (آئی ایس پی آر) کے مطابق بریفنگ میں وزیراعلیٰ خیبر پختونخوا، وزیر داخلہ اور دیگر اعلیٰ حکام نے شرکت کی۔

اس موقع پر آرمی چیف کو قانون نافذ کرنے والے اداروں کی کارروائیوں اور ان کی کامیابیوں سے متعلق آگاہ کیا گیا۔

جنرل عاصم منیر نے سیکیورٹی فورسز اور قانون نافذ کرنے والے اداروں کے اہلکاروں کی قربانیوں کو خراجِ عقیدت پیش کرتے ہوئے کہا کہ ہم فتنہ الخوارج اور ان کے نیٹ ورک کے خلاف متحد ہیں۔

آئی ایس پی آر کے مطابق آرمی چیف نے دہشت گردوں کے مذموم عزائم کو ناکام بنانے اور ان کے نیٹ ورک کی کمر توڑنے میں سیکیورٹی فورسز کے کردار کو سراہا۔

انہوں نے کہا کہ پاکستان کی مسلح افواج اور قانون نافذ کرنے والے ادارے غیر متزلزل عزم کے ساتھ قومی سلامتی کے دفاع میں مصروفِ عمل ہیں۔

جنرل عاصم منیر نے مزید کہا کہ ہم شیطانی قوتوں کے خلاف یکجا کھڑے ہیں اور سیکیورٹی فورسز کی بے مثال کامیابیوں پر فخر ہے۔

 آئی ایس پی آر کے مطابق آرمی چیف نے فورسز کے حوصلے، پیشہ ورانہ مہارت اور قربانیوں کو خراجِ تحسین پیش کرتے ہوئے دہشت گردی کے خلاف جاری آپریشنز میں مزید تیزی لانے کی ہدایت کی۔