امیر جماعت اسلامی پاکستان حافظ نعیم الرحمان نے کہا کہ اسرائیلی مصنوعات کا مکمل بائیکاٹ کرنا چاہئے۔

امیر جماعت اسلامی پاکستان حافظ نعیم الرحمان نے ایکسپو سینٹر میں میڈیا سے گفتگو کرتے ہوئے کہا کہ پاکستان بزنس فورم کو مبارکباد پیش کرتا ہوں، مسلسل دوسرے سال کامیابی کے ساتھ اس نمائش کا انعقاد کیا جارہا ہے۔

 حافظ نعیم الرحمان نے کہا کہ فلسطینوں پر جو ظلم ایک سال قبل شروع ہوا وہ آج تک جاری ہے، اس تمام صورتحال میں پاکستان بزنس فورم نے فلسطینیوں کے لیے یہ نمائش سجائی ہے۔

انہوں نے کہا کہ اس کا مقصد پورے پاکستان کو متوجہ کرنا ہے، اس مرتبہ نمائش میں مصنوعات کے  400 اسٹالز  لگائے گئے ہیں۔

حافظ نعیم الرحمان نے کہا کہ نہتے لوگ اسرائیل کے خلاف برسر پیکار ہیں انہوں نے اپنی زمین نہیں چھوڑی، نیتن یاہو نے اسی حماس سے معاہدہ کیا ہے جو کہہ رہا تھا حماس کو فنا کردیں گے۔

ان کا یہ بھی کہنا تھا کہ اہل پاکستانیوں نے ہر موقع پر فلسطینیوں کے ساتھ اظہار یکجہتی کیا ہے، ہم اہل غزہ کے ساتھ ہیں اور مکمل سپورٹ کرتے رہیں گے۔

حافظ نعیم الرحمان نے کہا کہ آج معاہدہ ہونے کے باوجود اسرائیل گھٹیا دشمن ہے جو آج بھی بمبارمنٹ کررہا ہے، میرا برانڈ پاکستان ایک بہترین کاوش ہے ہم یہاں پاکستانی مصنوعات پیش کررہے ہیں۔

انہوں نے کہا کہ کراچی کی صنعتوں کو مہنگی ترین بجلی فراہم کی جاتی ہے، کے الیکٹرک ایک مافیا ہے جو کراچی کے عوام کا خون چوس رہا ہے، ہمارے سندھ میں  سسٹم کام کررہا ہے۔

حافظ نعیم الرحمان نے کہا کہ آرمی چیف نے بھی تاجروں صنعتکاروں کو کہا تھا سندھ سے چلنے   والے سسٹم کا خاتمہ کریں گے، سندھ اور کراچی سے مکمل سسٹم کا خاتمہ کیا جائے۔

انہوں نے کہا کہ سیاسی استحکام ضروری ہے ہر کوئی اسٹیبلشمنٹ کی جانب دیکھتا ہے، ہر کوئی آئینی حدود میں کام کرے۔

حافظ نعیم الرحمان نے مزید یہ بھی کہا کہ بانی پی ٹی آئی پر جو مقدمات ہیں، یہ سیاسی مصلحت کے تحت ہیں، سیاسی بنیادوں پر یہ مقدمات بنائے گئے ہیں انہیں ختم ہونا چاہئے۔