کراچی: وزیراعلیٰ سندھ سید مراد علی شاہ نے شاہ فیصل انٹرسیکشن تا ایئرپورٹ روڈ کو بہتر کرنے کا فیصلہ کرلیا۔

وزیراعلیٰ مراد علی شاہ کی زیر صدارت ملیر ایکسپریس وے کی پیشرفت سے متعلق اہم اجلاس ہوا جس میں وزیراعلیٰ کو آگاہی دی گئی کہ لیر ایکسپریس وے کا 9 کلومیٹر کا پہلا سیگمنٹ مکمل ہے۔

وزیراعلیٰ سندھ مراد علی شاہ نے کہا کہ پہلا سیگمنٹ 11 یا 12 جنوری کو عوام کے لیئے کھولنا چاہتا ہوں۔

اجلاس میں وزیراعلیٰ نے قائدآباد انٹرسیکشن بھی 2 ماہ میں مکمل اور ملیر ایکسپریس وے پر آٹومیٹک ٹول لگانے کی بھی ہدایت دی۔

مراد علی شاہ کو آگاہی دی گئی کہ ٹول پر 18 بوتھ بنائے گئے ہیں، ملیر ایکسپریس وے پر کار کے لیئے 100 روپے ٹول ٹیکس ہوگا، بس کے لئے 200روپے ٹول ٹیکس ہوگا، ملیر ایکسپریس وے پر 7 تا 8 پولیس موبائل پیٹرولنگ کرتی رہیں گی، ملیر ایکسپریس وے پانچ پولیس تھانوں کی حدود میں آئے گا۔

وزیراعلیٰ سندھ نے ملیر ایکسپریس وے پر کار پیٹرولنگ تعینات کرنے کی بھی ہدایت دی اور کہا کہ تمام پولیس تھانے ملیر ایکسپریس وے کی سیکیورٹی کو یقینی بنائیں، ملیر ایکسپریس وے پر ایک ایمبولینس اور فائر برگیڈ بھی ہنگامی حالت کے لئے موجود ہو، فوری طور پر ریسکیو 1122 کی ایمبولینس کا بندوبست کریں۔

واضح رہے کہ اجلاس میں وزیر بلدیات سعید غنی، چیف سیکریٹری آصف حیدر شاہ، میئر کراچی مرتضیٰ وہاب، معاون خاص قاسم نوید، کمشنر کراچی حسن نقوی، ایڈیشنل آئی جی کراچی جاوید عالم اوڈھو، سیکریٹری بلدیات خالد حیدر شا، سیکریٹری ٹرانسپورٹ اسد ضامن اور دیگر شریک تھے۔