پشاور: آرمی چیف جنرل عاصم منیر نے خیبرپختونخوا کے سیاسی قائدین سے بات چیت کے دوران کہا کہ ہماری پالیسی صرف اور صرف پاکستان ہے۔

آرمی چیف جنرل عاصم منیر نے خیبرپختونخوا کے سیاسی قائدین سے پشاور میں بات چیت کی جس دوران ان کا کہنا تھا کہ افغانستان ہمارا برادر پڑوسی اسلامی ملک ہے جب کہ ہماری پالیسی صرف اور صرف پاکستان ہے۔

آرمی چیف جنرل عاصم منیر نے کہا  کہ پاکستان افغانستان سے ہمیشہ بہتر تعلقات کا خواہاں رہا ہے۔ صرف فتنہ الخوارج کی موجودگی اور سرحد پار دہشت گردی پر اختلاف ہے اور یہ اختلاف اس وقت تک رہے گا جب تک افغانستان مسئلے کو حل نہیں کرتا۔

آرمی چیف کہتے ہیں کہ خیبرپختونخوا میں بڑے پیمانے پر کوئی آپریشن نہیں کیا جارہا، صرف انٹیلی جنس کی بنیاد پر ٹارگیٹڈ کارروائی کی جاتی ہے جب کہ فتنہ الخوارج کی پاکستان کے کسی علاقے میں بھی عملداری نہیں۔

انہوں نے سوال اٹھایا کہ کیا فساد فی العرض اللہ کے نزدیک ایک بہت بڑا گناہ نہیں؟، ریاست ہے تو سیاست ہے اور خدانخواستہ ریاست نہیں تو کچھ بھی نہیں۔ ہم سب کو بلاتفریق دہشت گردی کے خلاف یکجا کھڑا ہونا ہوگا اور جب ہم متحد ہوکرچلیں گے تو صورتحال جلد بہتر ہوجائے گی۔

پاک فوج کے سربراہ کا مزید کہنا تھا کہ انسان خطا کا پتلا ہے اور ہم سب غلطیاں کرتے ہیں، لیکن ان غلطیوں کو نہ ماننا اور سبق نہ سیکھنا اس سے بھی بڑی غلطی ہے جب کہ عوام اور فوج کے درمیان ایک خاص رشتہ ہے۔

آرمی چیف جنرل عاصم منیر نے بتایا کہ عوام اور فوج کے رشتے میں جھوٹا بیانیہ مخصوص ایجنڈے پر چلایا جاتا ہے جب کہ نیشنل ایکشن پلان پر سب پارٹیز کا اتفاق حوصلہ مند ہے اور نیشنل ایکشن پلان پر تیزی سے کام کرنا ہوگا۔