وفاقی وزیر اطلاعات عطاءاللہ تارڑ نے کہا کہ چیمپئنز ٹرافی کے انعقاد سے پاکستان کا تشخص مزید بہتر ہوگا۔

وفاقی وزیر اطلاعات عطاءاللہ تارڑ نے میڈیا کرکٹ لیگ 2025 کی افتتاحی تقریب سے خطاب کرتے ہوئے کہا کہ میڈیا کرکٹ لیگ کے انعقاد پر جنگ میڈیا گروپ سمیت تمام سپانسرز کو مبارکباد پیش کرتا ہوں۔

 عطاءاللہ تارڑ نے کہا کہ کھیلوں جیسی مثبت سرگرمیوں کو فروغ دینے کی ضرورت ہے، خوبصورت کرکٹ گراﺅنڈ میں شائقین کو اچھا کھیل دیکھنے کو مل رہا ہے، میڈیا کرکٹ لیگ میں شریک تمام کرکٹ ٹیموں کو مبارکباد پیش کرتا ہوں۔

وفاقی وزیراطلاعات نے کہا کہ میڈیا کی تمام ٹیموں کے لیے نیک خواہشات کا اظہار کرتا ہوں، بہترین کارکردگی کا مظاہرہ کرنے والی ٹیم کو انعامات دیئے جائیں گے۔

عطاءاللہ تارڑ نے کہا کہ پاکستان میں چیمپئن ٹرافی کا بڑا ایونٹ بھی آ رہا ہے، الحمد اللہ پاکستان میں ایسے ٹورنامنٹس کی میزبانی کی بڑی صلاحیت موجود ہے،پاکستان نے کھیل کے میدان میں اچھی کامیابیاں حاصل کی ہیں محسن نقوی نے بطورچیئرمین پی سی بی بہت اچھے کام کیے ہیں۔

 وزیراطلاعات نے یہ بھی کہا کہ ایس سی او کے کامیاب انعقاد سے سب کو معلوم ہو گیا ہے کہ ہم بڑے ایونٹس منعقد کرنے کی صلاحیت رکھتے ہیں، اڑان پاکستان پروگرام میں کھیل بھی شامل ہیں۔

عطاءاللہ تارڑ نے کہا کہ2025 خوشخبریوں کا سال ہے، متحد ہو کر پاکستان کی معیشت کو بہتر کر سکتے ہیں، اسٹاک ایکسچینج دن بدن ریکارڈ قائم کر رہی ہے، کھیل کو سیاست میں اور سیاست کو کھیل میں شامل نہیں کیا جانا چاہئے، اسپورٹس مین شپ ہرشعبے میں ہونی چاہیے۔

 وزیراطلاعات کا یہ بھی کہنا تھا کہ پاکستان میں کھیلوں کی بہتری میں حکومت دن رات کوشاں ہے، پاکستان میں سستا ترین انٹرنیٹ صارفین کو فراہم کیا جا رہا ہے، بغیر کسی ثبوت کے وی پی اینز کے بارے میں پروپیگنڈا کیا گیا، تنقید ضرور کریں مگر پاکستان کا تشخص برباد نہ کریں۔

عطاءاللہ تارڑ نے کہا کہ اب تو سیاسی مخالفین بھی پاکستان کے معاشی استحکام کے معترف ہیں، سیاستدان آپس میں مذاکرات اور بات چیت کرتے رہتے ہیں، بات چیت سے ہی مسائل کا حل ممکن ہے۔