سیکیورٹی فورسز نے شمالی وزیرستان میں دو انٹیلیجنس بیسڈ آپریشنز کے دوران فتنہ الخوارج کے 9 دہشت گردوں کو ہلاک کر دیا، جب کہ 2 دہشت گردوں کو گرفتار کر لیا گیا۔

پاک فوج کے شعبہ تعلقات عامہ (آئی ایس پی آر) کے مطابق ان کارروائیوں میں دہشت گردوں کے قبضے سے بڑی مقدار میں اسلحہ اور بارودی مواد برآمد کیا گیا ہے۔

آئی ایس پی آر کے مطابق سیکیورٹی فورسز نے دو سلی کے علاقے میں دہشت گردوں کی موجودگی کی اطلاع پر آپریشن کیا، اس کارروائی میں 6 خارجی دہشت گرد مارے گئے، جب کہ 2 دہشت گردوں کو گرفتار کر لیا گیا۔

دوسرا انٹیلیجنس بیسڈ آپریشن شمالی وزیرستان کے علاقے ایشام میں کیا گیا، جہاں سیکیورٹی فورسز اور دہشت گردوں کے درمیان شدید فائرنگ کا تبادلہ ہوا۔ اس آپریشن کے دوران 3 خارجی دہشت گرد ہلاک جبکہ 2 زخمی ہو گئے۔

آئی ایس پی آر کے مطابق ہلاک ہونے والے خارجی دہشت گرد سیکیورٹی فورسز پر حملوں اور شہریوں کی ٹارگٹ کلنگ میں ملوث تھے۔ فورسز نے ان کے قبضے سے بھاری مقدار میں اسلحہ اور بارودی مواد برآمد کر لیا ہے۔

آئی ایس پی آر کا کہنا ہے کہ شمالی وزیرستان کو دہشت گردوں سے مکمل پاک کرنے کے لیے علاقے میں سینیٹائزیشن آپریشن جاری ہے۔ سیکیورٹی فورسز ملک میں امن و استحکام کے قیام کے لیے اپنی کارروائیاں بھرپور طریقے سے جاری رکھیں گی۔