پاکستان کرکٹ بورڈ کے چیئرمین محسن نقوی نے قذافی اسٹیڈیم کا تفصیلی دورہ کیا اس دوران ورکرز سے ملاقات کی اور انہیں دن رات کام پر شاباش دی۔

چیئرمین پی سی بی محسن  نقوی نے ورکرز کو 8 فروری کا ٹرائی نیشن سیریز کا میچ دیکھنے کی دعوت دی اور کہا کہ میں خود آپ کے ساتھ بیٹھ کر میچ دیکھوں گا۔

محسن نقوی نے نئی نشتوں پر بیٹھ کر اسٹیڈیم کا ویو دیکھا اور تمام فلورز، نئے ڈریسنگ رومز اور مختلف شعبوں کا معائنہ کیا۔

کرکٹ بورڈ کے چیئرمین محسن نقوی نے نئے ہاسپٹلٹی باکسز کا مشاہدہ بھی کیا اور کہا کہ انشاءاللہ نئے قذافی اسٹیڈیم کا افتتاح فروری کے پہلے ہفتے میں کیا جائے گا۔

انکا کہنا تھا کہ پاکستان کی تاریخ میں پہلی بار جدید ترین بین الاقوامی سہولتوں سے مزین اسٹیڈیم تیار کیا گیا ہے، کھلاڑیوں کے ساتھ شائقین کرکٹ نئی سہولتوں سے محظوظ ہوں گے۔

محسن نقوی نے مزید کہا کہ ہماری پوری ٹیم نے دن رات محنت سے کام کیا اور ناممکن ٹاسک کو ممکن بنایا،چیمپئنز ٹرافی ٹورنامنٹ پاکستان کی عزت ہے اور ہم اپنے وطن کی عزت میں مزید اضافہ کریں گے۔

اس دوران پراجیکٹ ڈائریکٹر ایف ڈبلیو او نے منصوبے پر پیش رفت سے آگاہ کیا جس کے بعد وزیر داخلہ محسن نقوی نے ایف ڈبلیو کی ٹیم کو خصوصی طور پر شاباشی دی۔

واضح رہے کہ ایڈوائزر عامر میر، چیف آپریٹنگ آفیسر سمیر احمد، ڈائریکٹرز انفراسٹرکچر۔ڈومیسٹک کرکٹ، ایف ڈبلیو او اور نیسپاک کے متعلقہ حکام اس موقع پر موجود تھے۔