وزارت مذہبی امور کو سرکاری حج اسکیم کے تحت عازمین حج سے حج اخراجات کی دوسری قسط بھی موصول ہوگئی ہے۔

سرکاری حج اسکیم 2025 کے لیے مجموعی طور پر جمع کرائی گئی رقم 48 ارب 90 کروڑ روپے تک پہنچ گئی ہے۔

ذرائع کے مطابق، رواں سال 81 ہزار 500 عازمین حج سرکاری اسکیم کے تحت فریضہ حج ادا کریں گے، جن سے دو اقساط میں ادائیگیاں وصول کی جا چکی ہیں۔

پہلی قسط کے طور پر ہر عازم سے 2 لاکھ روپے لیے گئے، جس کے تحت 16 ارب 30 کروڑ روپے جمع ہوئے۔ دوسری قسط کے طور پر فی عازم 4 لاکھ روپے وصول کیے گئے، جس کے تحت مزید 32 ارب 60 کروڑ روپے موصول ہوئے۔

وزارت مذہبی امور کے ذرائع کے مطابق، حج اخراجات کی دوسری قسط 27 دسمبر سے 2 جنوری تک ملک بھر کے مقررہ بینکوں کے ذریعے وصول کی گئی۔

سرکاری حج اسکیم کے تحت عازمین سے مجموعی طور پر تقریباً 100 ارب روپے وصول کیے جانے کا تخمینہ لگایا گیا ہے۔

ذرائع کے مطابق، حج اخراجات کی تیسری اور آخری قسط فروری کے دوسرے ہفتے میں وصول کی جائے گی، جو حتمی حج پیکج کے تعین کے بعد طے کی جائے گی۔

دریں اثناء، وزارت مذہبی امور حج انتظامات کو حتمی شکل دینے میں مصروف ہے، جس میں عازمین کے لیے رہائش، فضائی ٹکٹ، ٹرانسپورٹ، خوراک اور دیگر امور شامل ہیں۔

ذرائع کا کہنا ہے کہ تمام انتظامات مکمل کرنے کے بعد حتمی حج پیکج کا اعلان کیا جائے گا اور آخری قسط کی وصولی عمل میں لائی جائے گی۔