شمالی بحیرہ عرب میں پاک بحریہ اور سعودی بحریہ کے درمیان دوطرفہ میری ٹائم مشق “نسیم البحر XV” اختتام پذیر ہوگئی۔

پاک فوج کے شعبہ تعلقات عامہ (آئی ایس پی آر) کے مطابق مشق کا اختتام ایک شاندار فائر پاور مظاہرے کے ساتھ ہوا جس میں دونوں ممالک کی بحری افواج نے اپنی جنگی تیاری اور ہنر کا بھرپور مظاہرہ کیا۔

مشق کے اختتام پر کمانڈر رائل سعودی نیول فورسز، جو اس موقع پر مہمان خصوصی تھے، کے ہمراہ چیف آف دی نیول اسٹاف ایڈمرل نوید اشرف نے بھی میزائل فائرنگ کے مظاہرے کا مشاہدہ کیا۔

آئی ایس پی آر کا کہنا تھا کہ پاک بحریہ اور سعودی نیول فورسز کے جہازوں نے زمین سے سطح زمین اور فضا میں ہدف کو نشانہ بنانے والے میزائل فائر کیے، جو اپنے اہداف کو کامیابی سے نشانہ بناتے ہوئے آپریشنل تیاری اور حربی صلاحیتوں کا شاندار مظاہرہ کرنے میں کامیاب رہے۔

مشق “نسیم البحر XV” میں اینٹی سرفیس، اینٹی سب میرین وارفیئر اور مربوط میری ٹائم سیکیورٹی آپریشنز شامل تھے، جس سے دونوں بحری افواج کے درمیان عملی تعاون اور ان کی آپریشنل صلاحیتوں میں مزید بہتری کا واضح عندیہ ملتا ہے۔

آئی ایس پی آر کا مزید کہنا تھا کہ مشق نسیم البحر ہر دو سال بعد منعقد کی جانے والی دوطرفہ آپریشنل مشق ہے، جو دونوں ممالک کی اسٹریٹجک شراکت داری اور مشترکہ مفادات کے تحفظ کے عزم کی عکاسی کرتی ہے۔