وزیراعلیٰ بلوچستان سرفراز بگٹی کا کہنا ہے کہ بلوچستان کی ترقی کیلئے وفاقی حکومت کے تعاون کو سراہتے ہیں۔

 وزیراعلیٰ بلوچستان سرفراز بگٹی نے تقریب سے خطاب کرتے ہوئے کہا ہے کہ زراعت کے شعبے کو ترقی کی جانب لے جا رہے ہیں، بلوچستان کی ترقی کے لیے وفاقی حکومت کے تعاون کو سراہتے ہیں، عوامی مسائل کے حل کے لیے تمام وسائل بروئے کار لائیں گے۔

انہوں نے کہا کہ سوئی میں معاہدہ کرنے کا مقصد عوامی فلاح کو یقینی بنانا ہے، پی ٹی آئی حکومت میں اس منصوبے پر توجہ نہیں دی گئی، سرداروں کی طرح عام آدمی کے بچوں کو آگے بڑھنے کے مواقع دیں گے، میرٹ کو یقینی بناتے ہوئے نوجوانوں کو روزگار کے مواقع دیں گے۔

سرفراز بگٹی نے کہا کہ بلوچستان کے نوجوانوں کو بیرون ملک روزگار کے مواقع فراہم کر رہے ہیں، صوبائی حکومت، پی پی ایل سوئی ماڈل ویلج منصوبہ مکمل کریں گے، میں نے احسن اقبال سے کہا کچی کینال کو بحال کرائیں، 2022 کے سیلاب میں ایک بار پھرکچی کینال ویران ہوگیا، میں پھراحسن اقبال کے پاس گیا کہا کچی کینال خشک ہوگئی، احسن اقبال نے پھر اس پر کام کیا اور آج آپ گندم لگارہے ہیں۔

  وزیراعلیٰ بلوچستان نے کہا کہ 30 سال پہلے معاہدے بند کمروں میں ہوتے تھے، پہلے یہ معاہدے اسلام آباد اور کوئٹہ میں ہوتے تھے، ہم نے فیصلہ کیا اب ایسے معاہدے وہاں ہوں گے جہاں کا منصوبہ ہوگا۔