پاکستان ایئر فورس کا دستہ سعودی عرب کی شاہ عبدالعزیز ایئر بیس پر ہونے والی اسپیئرز آف وکٹری ایکسرسائز 2025 میں کامیاب شرکت کے بعد وطن واپس پہنچ گیا۔

پاک فوج کے شعبہ تعلقات عامہ (آئی ایس پی آر) کے مطابق اس ایکسرسائز میں پاکستان ایئر فورس نے جے ایف 17 تھنڈر بلاک تھری لڑاکا طیاروں، کومبیٹ پائلٹس، اور ٹیکنیکل گراؤنڈ کریو کے ہمراہ حصہ لیا۔

پاکستان ایئر فورس کے طیاروں اور عملے نے ایکسرسائز کے دوران اپنی اعلیٰ آپریشنل صلاحیتوں کا شاندار مظاہرہ کیا۔

آئی ایس پی آر کا کہنا تھا کہ ان مشقوں کے دوران جے ایف 17 تھنڈر بلاک تھری طیاروں نے نان سٹاپ پروازیں کیں، جو طیاروں کی لانگ رینج آپریشنل صلاحیتوں کا واضح ثبوت ہے۔

اس کے علاوہ، ان طیاروں نے دوران پرواز ایئر ٹو ایئر ری فیولنگ کا بھی کامیاب مظاہرہ کیا۔

اسپیئرز آف وکٹری ایکسرسائز میں سعودی عرب، پاکستان، بحرین، فرانس، یونان، قطر، متحدہ عرب امارات، امریکہ اور برطانیہ سمیت مختلف ممالک نے حصہ لیا۔

آئی ایس پی آر نے کہا کہ اس ایکسرسائز کا مقصد حقیقت سے قریب ترین فضائی جنگ کے ماحول میں مشترکہ آپریشنز اور اشتراک کار کو فروغ دینا تھا۔

جے ایف 17 تھنڈر بلاک تھری طیاروں نے دنیا کے جدید ترین لڑاکا طیاروں کے مقابلے میں بہترین آپریشنل صلاحیتیں دکھائیں، اور اس کی تکنیکی خوبیوں کی بھرپور پذیرائی ہوئی۔

آئی ایس پی آر نے مزید کہا کہ اس کامیابی نے پاکستان ایئر فورس کی پروفیشنلزم اور آپریشنل تیاری کی عکاسی کی، اور ایکسرسائز کے دوران ان کے ایئر اور گراؤنڈ کریو کی بھرپور کارکردگی نے پاکستان کے دفاعی قابلیت کو مزید مستحکم کیا۔