آِل پاکستان ٹینیور ٹریک ایسوسی ایشن کی نو منتخب کابینہ کی حلف برداری کی تقریب منعقد ہوئی، جس میں وفاقی وزیر منصوبہ بندی احسن اقبال نے نو منتخب عہدیداروں سے حلف لیا۔

اس موقع پر خطاب کرتے ہوئے احسن اقبال نے کہا کہ وزیر اعظم شہباز شریف کی قیادت میں حکومت نے سخت فیصلے کیے، جس کی بدولت ملک کو معاشی استحکام ملا۔

وفاقی وزیر نے مزید کہا کہ تعلیم پائیدار ترقی کے لیے ناگزیر ہے اور تعلیم کے بغیر کوئی معاشرہ ترقی کی راہ پر گامزن نہیں ہو سکتا۔

احسن اقبال نے سائنس و ٹیکنالوجی کے شعبے میں مزید ترقی کی ضرورت پر زور دیتے ہوئے کہا کہ دنیا میں بالادستی صرف علم اور ٹیکنالوجی سے ہی ممکن ہے۔

انہوں نے کہا کہ تحقیق اور تعلیم کے ذریعے ہی ہم دنیا میں باوقار مقام حاصل کر سکتے ہیں۔

وزیر منصوبہ بندی نے یہ بھی کہا کہ معیشت کو ٹیکنومعیشت میں تبدیل کرنا وقت کی ضرورت ہے، اور ملک میں خوشحالی لانے کا سب سے آسان راستہ تعلیم ہے۔

انہوں نے اس عزم کا اظہار کیا کہ پاکستان ترقی کی راہ پر گامزن ہو چکا ہے، اور “اڑان پاکستان” منصوبہ ملکی ترقی اور خوشحالی کے لیے سنگ میل ثابت ہوگا۔

وفاقی وزیر نے اپنے خطاب کے آخر میں اس بات پر زور دیا کہ ہمیں تحقیق کی روایت کو دوبارہ زندہ کرنا ہے اور جامعات کو مستقبل کی ترقی کی بنیاد بنانا ہے تاکہ پاکستان عالمی سطح پر ترقی کے نئے افق کو چھو سکے۔