کراچی : پاک بحریہ کے زیر اہتمام 9 ویں کثیرالقومی بحری مشق امن 2025 جاری ہے، کثیر القومی بحری مشق 11 فروری تک جاری رہے گی۔

پاک بحریہ کی 9 ویں کثیر القومی بحری مشق امن 2025 کا آج تیسرا روز ہے، اس موقع پر “محفوظ سمندر، خوشحال مستقبل” کے عنوان سے امن ڈائیلاگ کا انعقاد کیا گیا جس میں شریک ممالک کی بحری افواج کے چیف آف نیول اسٹاف اور دیگر عہدیدار شریک ہیں۔

امن ڈائیلاگ میں مشترکہ سمندری خطرات، ماحولیاتی تبدیلیوں کے میری ٹائم سیکیورٹی پر اثرات سمیت مختلف اہم امور پر گفتگو ہوئی۔

اس موقع پر نیول چیف ایڈمرل نوید اشرف نے گفتگو کرتے ہوئے کہا کہ امن ڈائیلاگ کے شرکاء کو خوش آمدید کہتا ہوں، امن ڈائیلاگ کے ذریعے میری ٹائم سیکیورٹی کو لاحق خطرات سے آگاہی دینا ہے، امن ڈائیلاگ کا مقصد بلیواکانومی کا فروغ ہے۔

یاد رہے کہ کثیرالقومی بحری مشق 7 سے 11 فروری تک جاری رہے گی، دو روز قبل افتتاحی تقریب میں مشق کا باضابطہ آغاز شریک ملکوں کے جھنڈے بیک وقت لہرا کرکیا گیا تھا، افتتاحی تقریب میں نیول چیف کا پیغام پڑھ کر سنایا گیا۔

نیول چیف کا کہنا تھا کہ امن مشقوں کاخطے میں محفوظ وسازگار بحری ماحول کے قیام میں اہم کردار ہے، پاک بحریہ نےبحیرہ عرب میں میری ٹائم سیکیورٹی کیلئے متعدد اقدامات کیے۔

دوسری جانب کمانڈر پاکستان فلیٹ ریئر ایڈمرل عبدالمنیب نے کہا تھا کہ امن مشق دنیا بھر ک ممالک کو خطرات اور چیلنجز سے نمٹنے کے لیے ملکر کام کرنے کی دعوت دیتی ہے، سمندری خطرات میں بحری قذاقی سمیت دیگر چیلنجز تجارت دیگر امور پر اثر انداز ہوتے رہے ہیں۔

ان کا کہنا تھا کہ پاک بحریہ امن مشق میں پہلی بار امن ڈائیلاگ کا بھی آغاز کررہی ہے، امن ڈائیلاگ عالمی بحری قیادت کو سمندری مسائل پر تبادلہ خیال کرنے کا بہترین موقع فراہم کرے گا۔

قبل ازیں امن ڈائیلاگ پر پرومو جاری کیا گیا تھا، ویڈیو کو نقارہ امن کا نام دیا گیا، جس مین پاکستان کے تمام ثقافتی اورسماجی رنگوں کو اجاگر کیا گیا۔