سندھ کے وزیر داخلہ ضیاءاللہ لنجار نے شہر قائد میں ٹریفک حادثات کو روکنے کے لیے اہم اقدامات کا اعلان کیا ہے۔

ایک اعلیٰ سطحی اجلاس میں وزیر داخلہ سندھ نے بتایا کہ ضروری گاڑیوں کے علاوہ دیگر ہیوی ٹریفک پر پابندی عائد کی جا رہی ہے۔ انہوں نے کہا کہ ہیوی ٹریفک رات 11 بجے سے صبح 6 بجے تک سڑکوں پر آسکتی ہے۔

وزیر داخلہ سندھ نے مزید کہا کہ سالڈ ویسٹ مینجمنٹ کی گاڑیوں کی ٹیگنگ کروائی جا رہی ہے اور اس عمل کو مکمل کرنے کے لیے ساڑھے تین ہزار ہیوی گاڑیوں کو 15 دنوں میں ٹیگنگ یا رجسٹریشن کروانی ہوگی۔ اگر گاڑیوں کی ٹیگنگ یا رجسٹریشن نہ کروائی گئی تو چالان ہوگا۔

ضیاءاللہ لنجار نے کہا کہ بدھ کو آپریشنز اور ٹریفک ایس ایس پیز کے ساتھ میٹنگ کی جائے گی تاکہ ٹریفک کو بہتر طور پر منظم کیا جا سکے۔

انہوں نے مزید کہا کہ آپریشنل اور ٹریفک پولیس مشترکہ طور پر ٹریفک مینج کریں گی اور چالان کا اختیار ہیڈ کانسٹیبل تک دے دیا جائے گا۔

وزیر داخلہ سندھ نے کراچی میں روڈ بلاک کرنے والے افراد کے خلاف سخت کارروائی کا عندیہ دیا اور کہا کہ ایسے افراد کے خلاف مقدمہ درج کیا جائے گا۔

کمشنر کراچی کے اجلاس کے فیصلوں کا نوٹیفکیشن جاری کیا جائے گا، اور ان فیصلوں پر 144 کا نفاذ ہوگا۔

میئر کراچی مرتضیٰ وہاب نے اجلاس کے دوران کہا کہ شہریوں کی جان سب سے اہم ہے اور ٹریفک حادثات کی روک تھام کے لیے ہر ممکن اقدام اٹھایا جائے گا۔

انہوں نے کہا کہ ٹریفک حادثات میں روزانہ شہری جاں بحق ہو رہے ہیں اور ان حادثات کو ہر قیمت پر روکنا ہوگا۔