مظفر آباد: آرمی چیف جنرل عاصم منیر نے کشمیری عمائدین اور ویٹرنز سے خطاب میں کہا کہ کشمیر کی خاطر تین جنگیں لڑیں، دس اور لڑنی پڑیں تو انشاء اللّٰہ لڑیں گے۔

چیف آف آرمی اسٹاف جنرل سید عاصم منیر نے مظفرآباد، آزاد کشمیر دورے پر کشمیری عمائدین اور ویٹرنز سے اہم خطاب کیا جس دوران انہوں نے کہا کہ کشمیر بنے گا پاکستان، کشمیر اور پاکستان کا  رشتہ لازم و ملزوم ہے۔

آرمی چیف نے کہا کہ کشمیر کل بھی اور آج بھی پاکستان کا حصہ تھا اور رہے گا۔ آزادی کی شمع، کشمیریوں کی ایک پیڑھی دوسری پیڑھی کے حوالے کرتی چلی آرہی ہے۔ اگر ہم متحد اور مضبوط رہیں تو ہم ہر مشکل کا سامنا کرسکتے ہیں۔

ان کا کہنا تھا کہ اللّٰہ تعالیٰ نے کشمیر کی سر زمین کو قدرتی حسن اور وسائل سے نوازا ہے۔ آج، کل یا پرسوں یا تھوڑے عرصے تک مقبوضہ کشمیر میں زیادتی کرسکتے ہو مگر ہمیشہ کے لئے نہیں۔

انہوں نے کہا کہ کشمیر کا فیصلہ کشمیر کی عوام نے کرنا ہے، نہ کہ مقبوضہ کشمیر میں کِسی غاصب فوج نے، کشمیر کی خاطر تین جنگیں لڑیں ہیں، دس اور لڑنی پڑیں تو انشاء اللّٰہ لڑیں گے۔

آرمی چیف نے قائداعظم محمد علی جناح کے اس فرمان کو دہرایا کہ ’’کشمیر پاکستان کی شہ رگ ہے‘‘ اور کہا کہ شہ رگ کو جسم سے کاٹنے کا مطلب زندگی کا خاتمہ ہے۔

جنرل عاصم منیر کہتے ہیں کہ مسلمان کبھی دشمن کی تعداد یا ہتھیاروں سے معیوب نہیں ہوتا، ایمان، تقویٰ اور جہاد فی سبیلِ اللّٰہ کی بنیاد پر اللّٰہ کا گروہ ہی ہمیشہ غالب رہے گا۔

انہوں نے مزید کہا کہ کشمیر میں انٹرنیٹ کی سہولیات کو بہتر بنائیں گے اور آئی ٹی سیکٹر میں یوتھ کے لیے روزگار پیدا کریں گے۔

کشمیری معززین نے اپنے تاثرات دیتے ہوئے کہا کہ پاک فوج نہ ہوتی تو ہمارا حال فلسطین سے بھی بدتر ہوتا- پاک فوج اور کشمیری عوام کا اٹوٹ رشتہ ہے، آپ کے کشمیر آنے سے آر پار کشمیریوں کے حوصلے بلند ہوئے۔

حاضرین کا کہنا تھا کہ ہمارے دل پاکستان کے ساتھ دھڑکتے ہیں، جموں و کشمیر کی عوام پاکستان کے ساتھ جڑی ہے اور جڑی رہے گی، پاکستان سے بڑھ کر کشمیر کا کوئی ترجمان نہیں ہوسکتا۔