اسلام آباد: انٹرنیشنل اٹامک انرجی ایجنسی (آئی اے ای اے) کے ڈائریکٹر جنرل رافیل ماریانو نے دورہ پاکستان کی تفصیلات سامنے آگئیں۔

ترجمان دفتر خارجہ کے مطابق انٹرنیشنل اٹامک انرجی ایجنسی کے ڈائریکٹر جنرل رافیل ماریانو نے 12 اور 13 فروری کو پاکستان کا دورہ کیا جس دوران ڈی جی آئی اے ای اے نے وزیراعظم اور نائب وزیراعظم سے ملاقاتیں کیں۔

دفتر خارجہ نے بتایا کہ آئی اے ای اے اور پاکستانی قیادت کی ملاقاتوں میں ایٹمی توانائی کے ماحولیاتی تبدیلیوں کے پس منظر میں پرامن استعمال کو فروغ دینے پر بات چیت کی گئی۔

ترجمان نے کہا کہ ڈی جی آئی اے ای اے نے پاکستان اٹامک انرجی کمیشن کے چیئرمین اور پاکستان نیوکلیئر ریگولیٹری اتھارٹی کے سربراہ سے بھی باضابطہ بات چیت کی۔

ترجمان کا کہنا تھا کہ ڈی جی آئی اے ای اے کو پاکستان کی نیوکلیئر سائنس اور ٹیکنالوجی میں پیشرفت اور پاکستان میں زراعت، صحت اور توانائی کے لیے ایٹمی ٹیکنالوجی کے استعمال سے بھی آگاہ کیا گیا۔

دفتر خارجہ کا مزید کہنا تھا کہ اسلام آباد میں ڈی جی آئی اے ای اے نے نیوکلیئر فیلڈ میں پاکستانی خواتین کے حوالے سے بین الاقوامی کانفرنس میں شرکت کی جب کہ انہوں نے پائیدار ترقی کے اہداف کے حصول کے لئے ایٹمی توانائی کے کردار پر سیمینار سے کلیدی خطاب بھی کیا۔