وفاقی وزیر اطلاعات عطاءاللہ تارڑ نے کہا کہ ہمیں ایسے میڈیا کی ضرورت ہے جو سماجی مسائل پر روشنی ڈالے اور لوگوں کو اپنی بات کہنے کا موقع فراہم کرے۔

وفاقی وزیر اطلاعات عطاءاللہ تارڑ نے ریاض میں سعودی میڈیا فورم 2025  کے زیر اہتمام مباحثے میں اظہار خیال کرتے ہوئے کہا کہ سعودی عرب میں وژن 2030کے تحت رونما ہونے والی تاریخی تبدیلیوں کا مشاہدہ کر کے خوشی ہوئی، وژن 2030 ایک خواب نہیں بلکہ عملی شکل اختیار کر چکا ہے۔

عطاءاللہ تارڑ نے کہا کہ سعودی ولی عہد شہزادہ محمد بن سلمان کی قیادت میں ایک عظیم انقلاب آ چکا ہے، پاکستان میں میڈیا کو جدید تقاضوں سے ہم آہنگ کیا جا رہا ہے، ہم الیکٹرانک، پرنٹ اور ڈیجیٹل میڈیا پر کام کر رہے ہیں۔

وفاقی وزیر اطلاعات نے کہا کہ پاکستان کی 24 کروڑ آبادی میں سے 18 کروڑ افراد انٹرنیٹ استعمال کرتے ہیں، پاکستان کی آبادی کا 60 فیصد حصہ 30 سال سے کم عمر نوجوانوں پر مشتمل ہے۔

عطاءاللہ تارڑ نے کہا کہ ہم دریائے سندھ کے کنارے بسنے والی ایک قدیم تہذیب کے امین ہیں، پاکستانی ایک متحرک اور پرجوش قوم ہے جو کے ٹی جیسی بلند چوٹیوں کی محافظ ہے، ٹیلنٹ اور ہنر کی پہچان بہت ضروری ہے۔

 وفاقی وزیر اطلاعات کا یہ بھی کہنا ہے کہ میڈیا کے عالمی اداروں کے ساتھ شراکت داری مفید اور مثبت قدم ثابت ہو سکتی ہے، پاکستان میں باصلاحیت افراد موجود ہیں۔

عطاءاللہ تارڑ نے کہا کہ آسکر ایوارڈ یافتہ شرمین عبید چنائے، نوبل انعام یافتہ ملالہ یوسفزئی اور ثمینہ بیگ جیسی خواتین پاکستان کا فخر ہیں، ثمینہ بیگ واحد خاتون کوہ پیما ہیں جنہوں نے ماﺅنٹ ایورسٹ اور کے ٹو سمیت دنیا کی سات بلند ترین چوٹیوں کو سر کیا۔

وفاقی وزیر اطلاعات نے کہا کہ تنہائی ترقی کی راہ میں سب سے بڑی رکاوٹ ہے، ترقی کیلئے تعاون بہت ضروری ہے، پاکستان کے پاس بہترین نیوز چینلز، تفریحی چینلز، فلم سازی اور دستاویزی فلمیں بنانے کی بھرپور صلاحیت موجود ہے، اب وقت آ گیا ہے کہ نئے معاہدے کئے جائیں، اشتراک بڑھائیں اور عالمی میڈیا پر اپنی شناخت بنائیں، بین الاقوامی تعاون سے نہ صرف مواقع بڑھتے ہیں بلکہ انسانی ترقی بھی ممکن ہوتی ہے۔

عطاءاللہ تارڑ کا یہ بھی کہنا ہے کہ غزہ جیسے عالمی مسائل کے بارے میں صحیح اور حقیقی معلومات کی فراہمی ضروری ہے تاکہ دنیا وہاں ہونے والے مظالم سے آگاہ ہو سکے، پاکستان میڈیا کے شعبے میں بین الاقوامی تعاون کا خیرمقدم کرتا ہے، غلط معلومات اور جھوٹی خبروں کے پھیلاﺅ کو روکنے کے لئے ٹھوس اقدامات ناگزیر ہیں، ترقی اور بہتری کی گنجائش ہمیشہ رہتی ہے۔

وفاقی وزیر اطلاعات نے کہا کہ عالمی شراکت داری کے ذریعے مقامی میڈیا اداروں میں مثالی تبدیلی لائی جا سکتی ہے، تعاون کو مزید فروغ دینا ہماری پالیسی کا حصہ ہے، پاکستان کے پاس ایک عظیم ثقافتی ورثہ ہے، یہاں کے لوگوں کے پاس بہت سی کہانیاں ہیں جو دنیا کے سامنے لانے کی ضرورت ہے۔

عطاءاللہ تارڑ نے کہا کہ بین الاقوامی تعاون کے ذریعے ہم اپنی صلاحیتوں کا بہتر طریقے سے ادراک کر سکتے ہیں، بین الاقوامی آﺅٹ لیٹس کی پاکستان میں مقامی میڈیا آﺅٹ لیٹس کے ساتھ شراکت داری خوش آئند ہوگی، فیک نیوز اور مس انفارمیشن سب سے بڑا خطرہ اور چیلنج ہیں جو سماجی مسائل کا باعث بنتے ہیں۔

وفاقی وزیراطلاعات نے کہا کہ ہمیں اس چیلنج کا حل تلاش کرنے کی ضرورت ہے، عالمی سطح پر ایک ایسا ادارہ ہونا چاہئے جہاں مصنوعی ذہانت کے ذریعے حقائق کی جانچ کا نظام موجود ہو، سوشل میڈیا پر مصنوعی ذہانت کا استعمال منصفانہ ہونا چاہئے، اسے کسی ایک جانب نہیں جھکایا جا سکتا۔

 عطاءاللہ تارڑ نے مزید یہ بھی کہا کہ حقائق کی تصدیق کیلئے جامع، مستند اور معتبر نظام ناگزیر ہے جس پر لوگ بھروسہ کر سکیں، عالمی میڈیا اداروں کی مقامی میڈیا کے ساتھ تعاون اور اشتراک کے لئے تیار ہیں، اس طرح کی شراکت داری سے شفافیت کی حوصلہ افزائی ہوگی۔