لاہور: وزیر اطلاعات پنجاب عظمیٰ بخاری نے کل کشمیری عوام کے ساتھ بھرپور اظہارِ یکجہتی کرنے کا اعلان کردیا۔

وزیر اطلاعات پنجاب عظمیٰ بخاری نے میڈیا سے گفتگو میں کہا کہ دہشت گردی کے خلاف جان کا نذرانہ دینے والے شہداء ہمارے ماتھے کا جھومر ہیں، بھارت ہمیشہ پاکستان میں حالات خراب کرنے کی کوشش کرتا ہے لیکن پاکستان نےہمیشہ کہا ہے کہ ہم اچھے تعلقات چاہتے ہیں۔

عظمیٰ بخاری کا کہنا ہے کہ ہم کشمیریوں کی حق خودارادیت کی جنگ میں ان کے ساتھ ہیں، ن لیگ نے ہر فورم پر کشمیریوں کا مقدمہ پیش کیا ہے اور ہم عالمی برادری کا ضمیر جھنجھوڑتے رہیں گے، عالمی برادری کو دوہرا معیار ترک کرنا ہوگا۔

وزیر اطلاعات پنجاب نے بتایا کہ لبرٹی چوک کو کشمیر کے نام سے منسوب کیا ہے، عالمی برادری مقبوضہ کشمیر میں انسانی حقوق کی خلاف ورزیوں کا نوٹس لے۔ کشمیر میں آج بھی ظلم ہورہے ہیں جس پر توجہ دلانے کی ضرورت ہے۔

انہوں نے بانی پی ٹی آئی کو تنقید کا نشانہ بناتے ہوئے کہا کہ ایک نام نہاد کہتے تھے میں کشمیریوں کا مقدمہ لڑنے جارہا ہوں جب کہ کشمیریوں کا مقدمہ وزیراعلیٰ پنجاب سب کے سامنے رکھیں گی اور کل کشمیری عوام کے ساتھ بھرپور اظہار یکجہتی کریں گے۔

ان کا کہنا تھا کہ حق خودارادیت کے حصول تک کشمیریوں کی حمایت جاری رکھیں گے، کشمیر کےمسئلے پر جس طرح بات ہونی چاہیے ویسے ہوتی نہیں، سیاسی جماعت کے پاس مریم نواز کے کام میں کیڑے نکالنے کے سوا کچھ نہیں ہے۔

انہوں نے مزید کہا کہ دہشت گردی کے جن کو نوازشریف نے بند کردیا تھا، کسی نے آکر دہشت گردی کے جن کو باہر نکالا ہے۔ یہ کبھی پاؤں پکڑنا چاہتے ہیں تو تو کبھی خط لکھتے ہیں جب کہ یہ منت مانگ کر این آر او مانگ رہے ہیں۔