وزیر اعلیٰ پنجاب مریم نواز نے کہا کہ سپر سیڈرز سے زراعت میں جدت کا خواب حقیقت بن رہا ہے۔

سپر سیڈرز کے ذریعے گندم کی بوائی کے بہترین نتائج سامنے آنے پر کاشتکاروں نے اپنے تاثرات بیان کرتے ہوئے کہا کہ سپر سیڈرز کے ذریعے گندم کی بوائی روایتی طریقہ کار کی نسبت بہترین ہے۔

کاشتکار کا کہنا ہے کہ زمین کی زرخیزی بڑھانے کے لیے سپر سیڈرز کا استعمال عمدہ نتائج کا حامل ہے، سپر سڈرز سے ایک ایکڑ میں گندم کی بوائی صرف ایک گھنٹے میں مکمل ہونے سے وقت اور وسائل بچتے ہیں۔

کاشتکاروں نے اس عزم کا ظہار کیا کہ آئندہ بھی سپر سیڈرز استعمال کرکے ہی گندم کاشت کریں گے۔

 وزیر اعلیٰ پنجاب مریم نواز شریف نے سپر سیڈرز کے نتائج پر اظہار اطمینان کرتے ہوئے کہا کہ ایگریکلچر میکانائزیشن صرف آغاز ہے، زراعت میں مزید انقلابی اقدامات کریں گے-

مریم نواز نے کہا کہ لیبر کاسٹ، وقت اور ایندھن کی بچت سے کسانوں کو بڑا ریلیف ملا، ہمارا مشن کسانوں کی خوشحالی، زراعت میں جدت اور ترقی ہے۔

وزیر اعلیٰ پنجاب نے مزید یہ بھی کہا کہ پنجاب کو جدید زرعی ٹیکنالوجی کا مرکز بنا ہمارا عزم ہے، پیداواری لاگت میں کمی اور زیادہ منافع ہماری حکمت عملی کا حصہ ہے-

پنجاب میں سپر سیڈر ز کے استعمال سے شاندار نتائج سامنے آنا شروع ہوگئے ہیں جس کے مطابق ایک ہزار کاشتکاروں نے چند ماہ میں 57کروڑ 95لاکھ روپے کمالیے۔

سپر سیڈرز سے بوائی پر 100 روپے فی ایکڑمزدوری کی مد میں بچت، جبکہ بیج کے استعمال میں 50 کلو سے 47 کلو فی ایکڑ کمی ہوئی ہے۔

صوبے بھر میں گندم کی کاشت میں سپر سیڈرز کے ذریعے 330 ٹن بیج کی بچت ہوئی جبکہ روایتی طریقہ کار کے مقابلے میں 18لاکھ 70ہزار لیٹر ڈیزل کا کم استعمال ہوا۔

سپر سیڈرز سے کاشت پر ڈیزل کے استعمال میں 48کروڑ 62 لاکھ روپے، جبکہ کاشتکار کو سپر سیڈرز سے گندم کی بوائی پر فی ایکڑ3666روپے کی بچت ہوئی۔

31 اضلاع میں 7805کاشتکاروں نے سپر سیڈرز کے ذریعے110014 ایکڑ اراضی پر گندم کی کاشت کی، 7805 کسانوں نے 68,185 ایکڑ پر  رینٹل سروس کے ذریعے سپر سیڈرز استعمال کیے، 93 فیصد کاشتکاروں نے سپر سیڈرز سے کاشت پر گندم کے اگاؤکو بہترین قرار دیا۔