نارووال: وفاقی وزیر پلاننگ اینڈ ڈویلپمنٹ احسن اقبال نے سابق صدر عارف علوی پر سنگین الزامات عائد کردیے۔

وفاقی وزیر پلاننگ اینڈ ڈویلپمنٹ احسن اقبال نے نارووال میں میڈیا سے اہم گفتگو کرتے ہوئے کہا کہ پی ٹی آئی نے سفارتی دہشت گردی شروع کر رکھی ہے۔

انہوں نے کہا کہ افسوس سے کہنا پڑھ رہا ہے کہ ایک ایسی شخصیت جو صدر مملکت کے عہدے پر رہی ہے جس نے پاکستان کے مفادات کے تحفظ کا حلف اٹھایا تھا، پی ٹی آئی کے سابق صدر مملکت عارف علوی امریکا میں پاکستان کی ریاست کے خلاف زہر گھول رہے ہیں۔

احسن اقبال کا کہنا تھا کہ پی ٹی آئی کا سوشل میڈیا اور ان کی بین الاقوامی تنظیمیں پاکستان کے خلاف مہم جوئی کر رہی ہیں، آج تک بدترین دشمن بھارت نے بھی یہ مہم جوئی پاکستان کے خلاف نہیں کی تھی۔

وفاقی وزیر کہتے یہیں کہ یہ سفارتی دہشت گردی کے مرتکب ہو رہے ہیں، یہ پاکستان کے خلاف پابندیاں لگوانا چاہتے ہیں لیکن یہ کامیاب نہیں ہوں گے۔ ان کی اپنی سیاست پاکستان کے مفاد سے اوپر رکھی ہوئی ہے۔

انہوں نے یہ بھی کہا کہ یہ کس شخص کے لئے شور مچا رہے ہیں، جس کی چوری کا دستاویزی ثبوت پکڑا گیا ہے جب کہ عمران خان نے تاریخ کی سب سے زیادہ شفاف دستاویزی چوری کی ہے۔

احسن اقبال نے بتایا کہ عمران خان نے وہ پیسہ پاکستان کے خزانے میں جمع کروانے کی بجائے اسی چور کو واپس دے دیا۔ بدترین ڈاکہ عمران خان نے پاکستان کے عوام کی دولت پر ڈالا ہے، جو شخص 64 ارب روپے کا ڈاکہ ڈالے کیا وہ سیاسی قیدی ہے یا پھر وہ مجرم اور چور ہے۔

وفاقی وزیر بتاتے ہیں کہ دنیا کی سب بڑی سیاسی کرپشن کا مجرم عمران خان ہے، جو پی ٹی آئی والے عمران خان کے لئے آواز اٹھا رہے ہیں یہ سب اس کرپشن کے حصہ دار ہیں، پی ٹی آئی کا فرض ہے ایسے چور ڈاکو کی قیادت سے چھٹکارا حاصل کریں۔

انہوں نے مزید کہا کہ کسی ایماندار آدمی کو اپنا چیئرمین بنائیں لیکن اگر پی ٹی آئی عمران کی قیادت میں رہتی ہے تو ہم کہہ سکتے ہیں یہ پورا چوروں کا ٹولہ ہے، پی ٹی آئی ورکرز کو چائیے تھا کہ وہ اپنے لیڈر کا گریبان پکڑتے۔