لاہور: وفاقی وزیر اطلاعات عطاء اللہ تارڑ نے کہا ہے کہ پیکا قانون کا مقصد فیک نیوز کا خاتمہ، ذمہ دارانہ صحافت کا تحفظ ہے۔

وزیر اطلاعات عطاء تارڑ نے اے پی پی ایمپلائز یونین پنجاب کی تقریب حلف برداری سے خطاب کرتے ہوئے کہا کہ پیکا ایکٹ کا مقصد فیک نیوز کا خاتمہ اور سوشل میڈیا کے خطرات کا تدارک کرنا ہے، سوشل میڈیا کے خطرات روکنے کے لئے یہ ایک اچھا اقدام ہے۔

انہوں نے کہا کہ پیکا ایکٹ میں دنیا کے بہترین طریقوں کو اپنایا گیا ہے، صحافت کی آڑ میں سوشل میڈیا کو مادر پدر آزاد نہیں چھوڑا جا سکتا، اس ایکٹ میں کوئی متنازعہ شق ہے تو سامنے لائی جائے ہم اس پر بات کرنے کے لئے تیار ہیں۔

عطاء تارڑ نے کہا کہ جلد ڈیجیٹل میڈیا پروٹیکشن اتھارٹی میں نجی شعبے سے نامزدگیاں کی جائیں گی، پریس کلب یا صحافتی تنظیموں سے منسلک صحافیوں کو اس میں شامل کیا جائے گا۔

انکا کہنا تھا کہ اداروں کے ملازمین قومی اثاثہ ہیں، ملازمین کی محنت، لگن اور مہارتیں ہی ادارے کی کامیابی کی بنیاد ہوتی ہیں، کرپشن نے اداروں کو ناقابل تلافی نقصان پہنچایا۔

وفاقی وزیر نے کہا کہ حکومت اداروں کی بہتری اور انہیں منافع بخش بنانے کے لئے تمام وسائل بروئے کار لا رہی ہے، وزارت اطلاعات کے ماتحت اداروں کو منافع بخش بنانے کیلئے تمام وسائل بروئے کار لائے جا رہے ہیں۔

انہوں نے کہا کہ صحافیوں کو درپیش مسائل کا حل اولین ترجیح ہے، پی ٹی وی، ریڈیو پاکستان اور اے پی پی قومی ادارے ہیں جو عوام کو معلومات کی فراہمی کی بنیادی ذمہ داریوں کے ساتھ ساتھ ملکی نظریاتی سرحدوں کے محافظ بھی ہیں۔

وزیر اطلاعات عطاء تارڑ نے مزید کہا کہ موجودہ دور جدید ٹیکنالوجی کا دور ہے، ہمیں دنیا کا مقابلہ کرنے کے لئے جدید ٹیکنالوجی کو اپنانا ہوگا۔