مسلم لیگ ن کے رہنما طلال چوہدری نے کہا ہے کہ تمام مسائل کا حل مذاکرات میں ہے۔

مسلم لیگ ن کے رہنما طلال چوہدری نے میڈیا سے گفتگو کرتے ہوئے کہا کہ سیاست پاکستان میں کام اور کارکردگی کی ہونی چاہیے، موازنہ، مقابلہ کام اور کارکردگی کاہونا چاہیے، موازنہ گالم گلوچ ،طعنے، احتجاج اور فساد کا نہیں ہوناچاہیے۔

طلال چوہدری نے کہا کہ 8 فروری کو ہونے والے الیکشن پر پھر جھوٹابیانیہ بنانے کی کوشش کی گئی، پوری دنیا بات کررہی ہےکہ پاکستان ٹیک آف کررہاہے، 8 فروری کے نتائج نےجھوٹے بیانے کو مسترد کردیا۔

انہوں نے کہا کہ فارم 47 کا نعرہ لگا کر عوام کو گمراہ کرنے کی کوشش کی گئی، ہم ملک کی تعمیروترقی جاری رکھیں گے، دوسری سائیڈ پر اس احتجاج اور فساد کا مقابلہ کرتے رہیں گے۔

طلال چوہدری نے یہ بھی کہا کہ مخالفین جھوٹا بیانیہ بنانے میں ماہر ہیں، آئی ایم ایف کو خط لکھا، 9 مئی کا واقعہ کیا، اسلام آباد پر چڑھائی کی، ایک سال میں ہی جھوٹے بیانیے کے پرخچے اڑگئے۔

ان کا یہ بھی کہنا تھا کہ پی ٹی آئی نے انتخابات کو جعلی کہناچھوڑ دیاہے، جس اسمبلی کو جعلی کہتے تھے پھر وہاں جاکر بیٹھ گئے، آئے روز احتجاج کے منصوبے بناتے ہیں، دہشتگردی کےخاتمےکے لیےکیوں نہیں بناتے؟

طلال چوہدری نے کہا کہ لوگوں نے احتجاج میں شامل ہوکردیکھ لیاہے، احتجاج سے لوگوں کو روزگار نہیں مل رہاجو باہر نکلیں گے، چیمپئنز ٹرافی کے انعقاد سے پاکستان کے وقار میں اضافہ ہوگا، تہیہ کیا ہے پاکستان کی تعمیروترقی کوجاری رکھیں گے۔