وفاقی کابینہ نے گوادر پورٹ آپریشنلائزیشن منصوبہ کو حتمی شکل دینے کے لیے ایک کابینہ کمیٹی تشکیل دے دی ہے، جس کی صدارت وزیر منصوبہ بندی احسن اقبال کریں گے۔

13 رکنی کمیٹی گوادر پورٹ کے آپریشنلائزیشن میں رکاوٹیں پیدا کرنے والے مسائل کا جائزہ لے گی اور ان کے حل کے لیے قابل عمل اقدامات تجویز کرے گی۔

کمیٹی کا مقصد گوادر پورٹ کے لیے ایک جامع حکمت عملی تیار کرنا ہے، جس میں اندرون ملک رابطہ کی کمی، ناکافی مالی مراعات اور سیکورٹی کی نازک صورتحال جیسے اہم مسائل شامل ہیں۔ کمیٹی ایک بین الاقوامی کانفرنس کا انعقاد بھی کرے گی تاکہ گوادر پورٹ کے بارے میں آگاہی فراہم کی جا سکے۔

کمیٹی کے ممبران میں وزیر دفاع، وزیر بحری امور، وزیر کامرس، وزیر مواصلات، سیکرٹری خارجہ امور، سیکرٹری کامرس، سیکرٹری ریلوے، چیئرمین این ایچ اے اور چیئرمین ایف بی آر شامل ہیں۔

وزارت بحری امور کمیٹی کو سیکرٹریل سپورٹ فراہم کرے گی اور کمیٹی 30 دنوں کے اندر اپنی رپورٹ کابینہ کو پیش کرے گی۔

کابینہ ڈویژن نے باضابطہ نوٹیفکیشن جاری کردیا ہے جس کے تحت کمیٹی کا قیام عمل میں لایا گیا ہے۔ کمیٹی گوادر پورٹ کے آپریشنلائزیشن منصوبے پر عمل درآمد کی نگرانی کرے گی۔

اور وسطی ایشیائی ممالک سمیت دیگر عالمی اقتصادی شراکت داروں کے مفادات کو گوادر پورٹ سے جوڑنے کے لیے سفارتی رسائی کو تیز کرے گی۔