مسلم لیگ (ن) کے سینئر رہنما طلال چوہدری نے کہا کہ پی ٹی آئی وکلاءکو انصاف سے نہیں صرف پیسے سے دلچسپی ہے۔

مسلم لیگ (ن) کے سینئر رہنما طلال چوہدری نے اپنے ایک بیان میں کہا کہ پی ٹی آئی کے وکلاءنے ثابت کر دیا کہ ان کی وفاداری پارٹی کارکنوں کے بجائے صرف مالی مفادات سے جڑی ہے۔

انہوں نے کہا کہ 69  مخلص کارکنوں کو قانونی ٹیم نے اس لیے چھوڑ دیا کیونکہ انہیں بھاری فیس نہیں دی گئیں، مختلف مقدمات میں ملوث کارکنوں کو بے یار و مددگار چھوڑ دینا یہ ثابت کرتا ہے کہ پی ٹی آئی کا قانونی ونگ اور ILF ان لوگوں کا ساتھ دینے کو تیار نہیں۔

 طلال چوہدری نے یہ بھی کہا کہ پی ٹی آئی کارکن آج قانونی مدد سے محروم کر دیئے گئے، پی ٹی آئی قیادت خود سہولیات سے لطف اندوز ہو رہی ہے جبکہ اس کے کارکن مشکلات کا شکار ہے، یہ پی ٹی آئی قیادت کا دوہرا معیار ہے۔

انہوں نے کہا کہ آئی ایل ایف کی جانب سے اپنے ہی کارکنوں کا دفاع نہ کرنا پی ٹی آئی کی اندرونی کرپشن اور منافقت کو بے نقاب کرتا ہے، انصاف اب صرف ان کے لیے ہے جو اس کی قیمت ادا کر سکتے ہیں، یہ ہے پی ٹی آئی کا انصاف کا نعرہ ہے۔

طلال چوہدری کا یہ بھی کہنا تھا کہ آئی ایل ایف کارکنوں کے قانونی دفاع کے لیے بنایا گیا تھا، آج خود ہی کارکنوں کا ساتھ چھوڑ چکا ہے، پی ٹی آئی کے وکلاءاپنے مؤکلوں کو کارکن نہیں بلکہ پیسہ کمانے کا ذریعہ سمجھتے ہیں۔

انہوں نے کہا کہ  پارٹی کے لیے قربانیاں دینے والے کارکن آج اسی پارٹی کی بے حسی کا شکار ہو رہے ہیں، پی ٹی آئی کا انصاف کا نعرہ اس وقت کھوکھلا ثابت ہو جاتا ہے جب اس کے اپنے کارکن عدالتوں میں بے سہارا ہوتے ہیں۔

طلال چوہدری نے مزید یہ بھی کہا کہ جب پیسہ بولتا ہے تو پی ٹی آئی کے وکلاءسنتے ہیں، وفاداری اور اصول ان کے لیے ثانوی حیثیت رکھتے ہیں، اگر پی ٹی آئی آج اپنے کارکنوں کے ساتھ نہیں کھڑی، تو کل یہ عوام کے ساتھ کیسے کھڑی ہوگی؟