کمانڈر پاکستان فلیٹ ریئر ایڈمرل عبدالمنیب نے کراچی میں ہونے والی ملٹی نیشنل میری ٹائم ایکسرسائز “امن 2025” اور پہلے امن ڈائیلاگ کی میڈیا بریفنگ میں تفصیلات سے آگاہ کیا۔

پاک فوج کے شعبہ تعلقات عامہ (آئی ایس پی آر) کے مطابق پاک بحریہ کے زیر انتظام یہ کثیرالقومی بحری مشق امن کا نواں ایڈیشن 7 سے 11 فروری تک منعقد کیا جائے گا۔

اس مشق میں 60 سے زائد ممالک اپنے بحری اور فضائی جہازوں، اسپیشل آپریشن فورسز/میرینز کی ٹیموں اور مندوبین کے ساتھ شرکت کر رہے ہیں۔

ہاربر فیز 7 سے 9 فروری تک منعقد ہوگا جس میں بحری امور سے متعلق سیمینارز، آپریشنل مظاہرے، بین الاقوامی ثقافتی اجتماعات اور کھیلوں کی سرگرمیاں شامل ہوں گی۔

آئی ایس پی آر کا کہنا تھا کہ سی فیز 10 سے 11 فروری تک جاری رہے گا جس میں انسدادِ بحری قزاقی اور دہشت گردی کی مشقیں، سرچ اینڈ ریسکیو آپریشنز، لائیو فائرنگ اور بین الاقوامی فلیٹ ریویو شامل ہوں گے۔

ریئر ایڈمرل عبدالمنیب نے مزید کہا کہ “امن ڈائیلاگ” کا آغاز بھی پہلی بار امن مشق 2025 کے ساتھ ہو رہا ہے جس میں دنیا بھر سے بحری افواج اور کوسٹ گارڈز کے سربراہان شرکت کریں گے۔ یہ عالمی بحری قیادت کو سمندری مسائل پر تبادلہ خیال کرنے کا بہترین موقع فراہم کرے گا۔

آئی ایس پی آر کے مطابق کمانڈر پاکستان فلیٹ نے اس موقع پر کہا کہ امن مشق میں بڑھتی ہوئی عالمی شرکت عالمی میری ٹائم سیکیورٹی میں پاک بحریہ کے کردار پر بین الاقوامی برادری کے اعتماد کو ظاہر کرتی ہے۔