مظفر آباد: وزیراعظم آزاد کشمیر انوار الحق نے اسمبلی کے خصوصی اجلاس سے خطاب میں کہا کہ ہم پاکستانی ہیں اور پاکستان ہمارا ہے۔

وزیراعظم آزاد کشمیر انوار الحق نے آزاد جموں و کشمیر اسمبلی کے خصوصی اجلاس سے خطاب کیا جس دوران ان کا کہنا تھا کہ مقبوضہ کشمیر کے لئے پاکستان کی حمایت میں کمی آئی نہ آئے گی جب کہ وزیراعظم شہباز شریف نے آزاد کشمیر کو 11 ارب کی گرانٹ دی۔

انہوں نے کہا کہ کشمیر تکمیل پاکستان کا نامکمل ایجنڈا ہے، مستحکم پاکستان تحریک آزادی کشمیر کی کامیابی کی واحد ضمانت ہے جب کہ ہم پاکستانی ہیں اور پاکستان ہمارا ہے۔

وزیراعظم آزاد کشمیر کا کہنا تھا کہ پاک فوج کے سپہ سالار کا یادگار شہدا آمد پر شکریہ ادا کرتا ہوں جب کہ کشمیر کے عوام کو واضح پیغام گیا کہ افواج پاکستان ان کو تنہا نہیں چھوڑے گی۔

انوار الحق کہتے ہیں کہ کشمیریوں نے نظریاتی طور پر الحاق پاکستان کا فیصلہ پہلے کرلیا تھا، یوم یکجہتی کشمیر تاریخی دن ہے اور یہ پاکستانیوں سمیت کشمیریوں کے غیرمتزلزل عزم کی تجدید کا دن ہے۔

انہوں نے بتایا کہ اہل پاکستان نے ہر مشکل گھڑی میں کشمیریوں کا ساتھ دیا، حکومت پاکستان کی سفارتی، سیاسی و اخلاقی حمایت پر شکر گزار ہیں۔

وزیراعظم آزاد کشمیر نے مزید کہا کہ 5 اگست 2019 کو بھارت کی انتہا پسند حکومت نے یک طرفہ اقدام کیا، بھارت کے یک طرفہ اقدام کو کشمیری عوام نے یکسر مسترد کردیا۔