کراچی: امیر جماعت اسلامی کراچی منعم ظفر نے کے الیکٹرک کو پبلک سیکٹر میں بجلی پیدا کرنے والوں کا سب سے بڑا مافیا قرار دے دیا ہے۔

امیر جماعت اسلامی کراچی منعم ظفر نے بول نیوز سے گفتگو میں کہا کہ کےالیکٹرک پبلک سیکٹر میں بجلی پیدا کرنے والوں کا سب سے بڑا مافیا ہے، کے الیکٹرک بجلی پیدا نہیں کررہی لیکن حکومت سبسڈی دے رہی ہے۔

انہوں نے کہا کہ نجکاری کے وقت وعدہ کیا گیا تھا کہ لوڈشیڈنگ کا خاتمہ ہوگا جب کہ عوام سے کیے گئے وعدے جھوٹے تھے اور کے الیکٹرک عوام کے لیے عذاب بنی ہوئی ہے۔

ان کا کہنا تھا کہ کہا جاتا ہے کہ 68 بلین روپے صارفین سے وصول کیے جائیں گے اور کے الیکٹرک کہتی ہے 68 بلین روپے بجلی چوری کے ہیں۔ جماعت اسلامی کراچی کی عوام کا مقدمہ لڑ رہی ہے جب کہ لوڈشیڈنگ ختم اور کراچی والوں کو سستی بجلی ملنی چاہیے۔

منعم ظفر کہتے ہیں کہ این ٹی ڈی سی سے پورے ملک کو بجلی مل سکتی ہے تو کراچی کو کیوں نہیں، 1100 میگاواٹ بجلی کراچی کو این ٹی ڈی سی سے ملتی ہے جب کہ کےالیکٹرک کے بوسیدہ پلانٹس ہیں اور کے الیکٹرک کے صارفین 18 سے 38 لاکھ ہوگئے ہیں۔

امیر جماعت اسلامی کراچی نے کہا کہ کےالیکٹرک چاہتی ہے بل پورے دو لیکن بجلی نہ دو جب کہ کےالیکٹرک کو لگام ڈالنے کی ضرورت ہے اور کےالیکٹرک کی اجارہ داری ختم کی جائے۔

انہوں نے ایم کیوایم پر تنقید کرتے ہوئے کہا کہ ایم کیو ایم اس وقت فارغ ہے اور وہ کےالیکٹرک کی نجکاری میں شامل تھی۔ ایم کیوایم کو کراچی کے اداروں کو بیچنے پر توبہ کرنی چاہیے۔

منعم ظفر نے مزید کہا کہ اگر ایم کیو ایم سنجیدہ ہے تو بات آگے بڑھائی جاسکتی ہے لیکن ہمیں ان کی سنجیدگی کا اندازہ ہے۔

واضح رہے کہ کے الیکٹرک بجلی کے مسائل حل کرنے میں ناکام ہوگئی ہے اور 200 ارب روپے کی حکومتی سبسڈی کے باوجود بھی ایک میگا واٹ تک بجلی پیدا نہیں کرسکی ہے جب کہ کے الیکٹرک پر 9 فیصد شیئرز رکھنے والا الجمیح کروپ غیر قانونی طور پر قابض ہے۔