وزیراعلیٰ پنجاب مریم نواز شریف نے پنجاب میں جدید آٹو میٹڈ ریپڈ ٹرانسپورٹ (اے آر ٹی) سسٹم متعارف کرانے کا فیصلہ کیا ہے۔

 اس حوالے سے اہم بریفنگ میں بتایا گیا کہ یہ سسٹم دنیا بھر میں کامیابی کے ساتھ استعمال ہو رہا ہے، خصوصاً ملائشیا، ابوظہبی اور قطر میں، جہاں یہ ماس ٹرانزٹ کے طور پر معروف ہے۔

وزیراعلیٰ مریم نواز نے اے آر ٹی کے فوری ٹرائل رن کی ہدایت دے دی ہے اور اس منصوبے کے ذریعے لاہور، فیصل آباد، گوجرانوالہ سمیت دیگر شہروں میں جدید ٹرانسپورٹ سسٹم کی بنیاد رکھی جائے گی۔

اس نظام کے تحت روایتی بسوں کی نسبت کم جگہ درکار ہوگی، اور یہ سسٹم تین کوچز پر مشتمل ہوگا، جس میں 300 سے زائد مسافر سوار ہو سکیں گے۔

اے آر ٹی بسوں میں مسافروں کے لئے مختلف جدید سہولتیں فراہم کی جائیں گی، جن میں فورسٹ چارجنگ، وائی فائی، مانیٹرنگ کیمرہ اور دیگر سہولتیں شامل ہوں گی۔

اس سسٹم کا ایک اہم پہلو یہ ہے کہ یہ روایتی فیول کی بجائے مکمل طور پر سولرائزڈ سسٹم پر کام کرے گا۔

وزیراعلیٰ مریم نواز نے کہا کہ پنجاب میں اس سسٹم کو چار سال کے اندر مکمل کرنا چاہتے ہیں اور اس کے تین مراحل میں دس شہروں میں نئے ٹرانسپورٹ سسٹم متعارف کرائے جائیں گے۔

اس کے ساتھ ساتھ ہر شہر میں فیڈر بسیں بھی چلائی جائیں گی تاکہ عوام کو بہترین سفری سہولتیں فراہم کی جا سکیں۔

مریم نواز شریف نے مزید کہا کہ اس جدید سسٹم کا مقصد نہ صرف لاہور جیسے بڑے شہروں میں سہولت فراہم کرنا ہے بلکہ چھوٹے شہروں کے رہائشیوں کو بھی اس سے فائدہ پہنچانا ہے، تاکہ تمام شہریوں کی محرومیاں دور کی جا سکیں اور ان کے معیار زندگی میں بہتری آئے۔