اسلام آباد: نائب وزیر اعظم اسحاق ڈار کا کہنا ہے کہ پاکستان اور ترکیہ کے درمیان برادرانہ تعلقات ہیں۔

نائب وزیراعظم اسحاق ڈار نے غیر ملکی خبر رساں ادارے ٹی آر ٹی کو انٹرویو میں کہا کہ پاکستان اور ترکیہ کی قیادت کے درمیان ملاقات ہوئی ہے جب کہ پاکستان اور ترکیہ کے درمیان برادرانہ تعلقات ہیں۔

اسحاق ڈار کا کہنا ہے کہ اسٹریٹجک اجلاس کی صدارت پاک ترکیہ کی قیادت نے مشترکہ کی جب کہ تجارت، سرمایہ کاری اور دفاع سمیت مختلف شعبوں میں قریبی تعاون ہیں، صدر طیب اردوان کا دورہ پاکستان کامیاب رہا۔

نائب وزیراعظم کہتے ہیں کہ غزہ اور مسئلہ کشمیر دیرینہ تنازعات ہیں، اقوام متحدہ کی سلامتی کونسل کی قراردادیں موجود ہیں لیکن غزہ، اور مسئلہ کشمیر سے متعلق سلامتی کونسل کی قراردادوں پرعمل درآمد نہیں ہوسکا۔

ان کا کہنا تھا کہ غزہ کےعوام کو ان کی سرزمین سے بے دخل کرنے کی تجویز ناقابل قبول ہے، غزہ میں مستقل جنگ بندی ہونی چاہئے۔ اقوام متحدہ کی سلامتی کونسل میں فلسطین کی رکنیت کے حامی ہیں۔

انہوں نے انٹرویوں کہا کہ مسئلہ کشمیر پر سلامتی کونسل قراردادوں پرعمل درآمد یقینی بنانا ہوگا، کسی ملک کی سرزمین دہشت گردی کےلیےاستعمال نہیں ہونی چاہئے، افغان حکومت اپنی سرزمین دہشت گردی کے لیے استعمال نہ ہونے دے۔

اسحاق ڈار مزید کہتے ہیں کہ پاکستان افغانستان میں امن و استحکام کا خواہاں ہے، پاکستان میں غیر قانونی مقیم غیر ملکیوں کو واپس بھجوایا جارہا ہے جب کہ پاکستان طویل عرصے سے افغان مہاجرین کی میزبانی کررہا ہے۔