عالمی ریٹنگ ایجنسی فچ نے پاکستان کی معاشی صورت حال پر رپورٹ جاری کر دی۔

فچ ریٹنگز کے مطابق پاکستان نے معاشی استحکام کی بحالی اور بیرونی ذخائر کی بہتری میں پیش رفت کی ہے، پاکستان میں معاشی اصلاحات پر پیش رفت کریڈٹ پروفائل کے لیے کلیدی حیثیت رکھتی ہے۔

فچ نے اصلاحات پر پیش رفت کو آئی ایم ایف کے آئندہ جائزوں کی کامیاب تکمیل سے مشروط کر دیا اور کہا کہ اصلاحات دیگر کثیر الجہتی اور دو طرفہ قرض دہندگان سے مالی معاونت کے تسلسل کے لیے کلیدی حیثیت رکھتی ہیں۔

رپورٹ میں بتایا گیا کہ اسٹیٹ بینک نے 27 جنوری کو پالیسی ریٹ کو 12 فیصد تک کم کرنے کا فیصلہ کیا، اس سے مہنگائی پر قابو پانے میں ہونے والی حالیہ پیش رفت کی عکاسی ہوتی ہے۔

عالمی ریٹنگ ایجنسی فچ نے کہا کہ جنوری 2025 میں مہنگائی کی سالانہ شرح 2 فیصد سے کچھ زیادہ رہی، پچھلے سال مہنگائی تقریباً 24 فیصد کی اوسط شرح پر تھی، مہنگائی میں تیزی سے کمی کی بنیادی وجوہات میں ماضی کے سبسڈی اصلاحات کے اثرات کا کم ہونا ہے۔

رپورٹ کے مطابق شرحِ تبادلہ میں استحکام  سخت مالیاتی پالیسی کے تحت ممکن ہوا، اس پالیسی نے ملکی طلب اور بیرونی مالی ضروریات کو کم کرنے میں مدد دی ہے، سخت پالیسی اقدامات، استحکام اور شرح سود میں کمی سے معاشی سرگرمیوں میں اضافہ ہوا۔

فچ نے اپنی رپورٹ میں مزید کہا کہ مالی سال 2025 میں حقیقی قدر میں تین فیصد اضافہ متوقع ہے، نجی شعبے کو دیا جانے والا قرض اکتوبر 2024 میں حقیقی معنوں میں مثبت ہو گیا۔