پاکستان میں 2025 کی پہلی قومی انسدادِ پولیو مہم کا باضابطہ آغاز کر دیا گیا ہے۔

نیشنل ایمرجنسی آپریشن سینٹر (ای او سی) کے مطابق، یہ مہم 3 فروری سے 9 فروری 2025 تک جاری رہے گی، جس میں 45 ملین سے زائد بچوں کو پولیو سے بچاؤ کے قطرے پلانے کا ہدف مقرر کیا گیا ہے۔

مہم کے دوران 4 لاکھ سے زائد مرد و خواتین پولیو ورکرز ملک بھر میں خدمات انجام دیں گے۔ وزیراعظم پاکستان کی فوکل پرسن برائے انسدادِ پولیو، محترمہ عائشہ رضا فاروق نے اسلام آباد اور راولپنڈی کی ہائی رسک یونین کونسلز کا دورہ کیا، جہاں انہوں نے مہم کا جائزہ لیا اور فیلڈ میں موجود پولیو ٹیموں سے ملاقات کی۔

ملاقات کے دوران، عائشہ رضا فاروق نے پولیو ٹیموں کی محنت اور عزم کو سراہا اور کہا کہ آپ کی کاوشیں قوم کے مستقبل کو محفوظ بنا رہی ہیں۔ آپ ہمارے ہیروز ہیں، اور آپ کی انتھک محنت کے باعث ہم جلد ہی پولیو سے پاک پاکستان کا ہدف حاصل کر لیں گے۔

عائشہ رضا فاروق نے والدین سے اپیل کی کہ وہ اپنے بچوں کے حفاظتی ٹیکہ جات کا مقررہ شیڈول بروقت مکمل کریں، تاکہ پولیو کے خاتمے میں مکمل کامیابی حاصل ہو سکے۔

انہوں نے اس عزم کا بھی اظہار کیا کہ وزیراعظم، وزرائے اعلیٰ، چیف سیکریٹریز اور سیکیورٹی ادارے پولیو کے خاتمے کے لیے پوری طرح پرعزم اور یکجا ہیں، اور وزیراعظم پاکستان کی جانب سے قومی پولیو مہم کا آغاز حکومت کے پولیو کے خاتمے کے عزم کا عملی اظہار ہے۔