جدہ: پاکستان اور سعودی عرب کے درمیان تجارتی حجم میں مزید اضافے کے امکانات روشن ہوگئے۔

وفاقی وزیر تجارت جام کمال خان نے جدہ میں اہم سعودی تاجروں سے ملاقات کی جس دوران باہمی تجارتی تعلقات کو فروغ دینے پر تبادلہ خیال کیا گیا۔

پاکستان کی سعودی عرب کو برآمدات میں 22 فیصد اضافہ ہوا جس کے بعد تجارتی حجم 700 ملین ڈالر تک پہنچ گیا جب کہ سعودی سرمایہ کاروں کی پاکستان میں توانائی، زراعت، آئی ٹی اور تعمیراتی شعبے میں دلچسپی ظاہر کی۔

پاکستان اور سعودی عرب کے درمیان اقتصادی تعلقات کو مزید وسعت دینے پر اتفاق کیا گیا، سعودی عرب سے پاکستان کو 7.4 بلین ڈالر کی ترسیلات زر موصول ہوئیں۔

وزیر تجارت جام کمال نے مالی تعلقات کی مضبوطی پر روشنی ڈالی اور البیک کے مالک رامی ابو غزالہ سے خصوصی ملاقات کی۔

دوران ملاقات فاسٹ فوڈ چین کی پاکستان آمد پر تفصیلی گفتگو کی گئی جب کہ البیک نے پاکستان میں اپنی شاخیں کھولنے کی تصدیق کردی ہے اور معاہدہ حتمی مراحل میں داخل ہوگیا ہے۔

اس موقع پر وزیر تجارت جام کمال نے کہا کہ پاکستانی ورکرز سعودی معیشت میں کلیدی کردار ادا کررہے ہیں، پاکستان کی نئی ویزا پالیسی کے تحت جی سی سی شہریوں کو ویزا فری انٹری اور 90 دن تک قیام کی سہولت دی گئی ہے۔

جام کمال خان کہتے ہیں کہ البیک کی پاکستان آمد سے روزگار کے مواقع پیدا ہوں گے، پاکستان میں کاروبار کے لیے سازگار ماحول ہے اور سعودی تاجروں کو سرمایہ کاری کی دعوت ہے۔

ان کا مزید کہنا تھا کہ پاکستان سنگل ونڈو اور نیشنل کمپلائنس سینٹر کے ذریعے کاروباری سہولیات میں بہتری آئی ہے جب کہ وزیر تجارت نے سعودی تاجروں کو ٹیکسپو، فوڈ اے جی اور ہیلتھ کیئر و منرل شو میں شرکت کی بھی دعوت دی۔