اعلیٰ عدالتوں میں ججز کی تقرری کے لیے قائم جوڈیشل کمیشن میں وکلا کی نمائندگی کرنے والے جوڈیشل کمیشن کے ممبر اختر حسین نے عہدے سے استعفیٰ دے دیا۔

ممبر جوڈیشل کمیشن اختر حسین نے استعفیٰ حالیہ ججز تبادلوں اور سنیارٹی ایشوز پر اختلافات کی وجہ سے دیا۔

ممبر جوڈیشل کمیشن اختر حسین نے اپنا استعفیٰ چیئرمین جوڈیشل کمیشن چیف جسٹس پاکستان جسٹس یحییٰ آفریدی کو ارسال کردیا۔

اختر حسین نے استعفیٰ میں لکھا کہ پاکستان بار کونسل نے مجھے آئینِ پاکستان 1973 کے آرٹیکل 175(A)(2)(vi) کے تحت تین مرتبہ جوڈیشل کمیشن آف پاکستان کا رکن نامزد کیا، میں اپنی ذمہ داریاں اپنی بہترین صلاحیتوں کے مطابق انجام دیتا رہا۔

انہوں نے کہا کہ حالیہ عدالتی تقرریوں سے متعلق تنازعات کی بنا پر میں مزید کام جاری نہیں رکھ سکتا، میں جوڈیشل کمیشن آف پاکستان کی رکنیت سے مستعفی ہوتا ہوں۔

اختر حسین نے کہا کہ اپنے اس استعفیٰ کی نقل پاکستان بار کونسل کو ارسال کر رہا ہوں تاکہ آئین پاکستان 1973 کے تحت میری جگہ نیا نامزد رکن مقرر کیا جا سکے، جوڈیشل کمیشن آف پاکستان کے معزز اراکین کی خدمت میں سلام پیش کرتا ہوں اور آپ کو یقین دلاتا ہوں کہ میں عدلیہ اور جمہوری اداروں کی ترقی اور خودمختاری کے لیے اپنی کوششیں جاری رکھوں گا۔

انہوں نے مزید لکھا کہ چیئرمین پاکستان بار کونسل کا شکریہ ادا کرتا ہوں، انہوں نے مجھ پر اعتماد کیا اور میری پوری مدت کے دوران تعاون فراہم کیا، آپ سے درخواست ہے کہ آئین کے مطابق میری جگہ نیا رکن نامزد کیا جائے۔

واضح رہے کہ اختر حسین جوڈیشل کمشین میں پاکستان بار کونسل کی نمائندگی کرتے تھے۔