وزیر اعظم شہباز شریف نے کہا کہ پاکستان کی باصلاحیت افرادی قوت ملک کا اصل اثاثہ ہیں۔

وزیراعظم شہباز شریف نے نوجوانوں کی پیشہ ورانہ تربیت کے حوالے سے بین الوزارتی جائزہ اجلاس کی صدارت کی، جس میں مختلف حکومتی اداروں کے نمائندگان نے شرکت کی۔

وزیراعظم نے اس موقع پر کہا کہ پاکستان کی باصلاحیت افرادی قوت ملک کا اصل اثاثہ ہے اور نوجوانوں کو پیشہ ورانہ ہنر سے لیس کرنا حکومت کی ترجیحات میں شامل ہے۔

وزیراعظم نے اس عزم کا اظہار کیا کہ پاکستان میں نرسنگ کی تربیت کے لیے اداروں کی تعداد کو بڑھایا جائے گا اور نرسنگ کو بین الاقوامی معیار سے ہم آہنگ کرنے کے لیے مناسب اقدامات کیے جائیں گے۔

انہوں نے مزید کہا کہ صنعتوں اور مقامی و بین الاقوامی مارکیٹ کی ضروریات کو مدنظر رکھتے ہوئے نوجوانوں کی تربیت کو مزید مؤثر بنایا جائے گا۔

اجلاس میں نیووٹیک کو ہدایت دی گئی کہ وہ نوجوانوں کی پیشہ ورانہ تربیت کے لیے فنڈنگ فراہم کرے اور ناقص کارکردگی والے تربیتی اداروں کو بلیک لسٹ کرے۔

وزیراعظم نے اس بات پر زور دیا کہ نیووٹیک اچھی کارکردگی والے اداروں کی حوصلہ افزائی کرے تاکہ تربیتی معیار میں مزید بہتری لائی جا سکے۔

وزیراعظم نے کہا کہ نوجوانوں کی پیشہ ورانہ تربیت کے ذریعے نہ صرف ان کی روزگار کے مواقع بڑھائے جائیں گے بلکہ ملک کی معیشت کو بھی مستحکم بنانے میں مدد ملے گی۔