اسلام آباد: صدر مملکت آصف زرداری اور وزیراعظم شہباز شریف نے بلوچستان میں جعفر ایکسپریس پر دہشت گردوں کے حملے کی شدید مذمت کی ہے۔

صدر آصف زرداری نے جعفر ایکسپریس پر دہشت گردوں کے حملے کی شدید مذمت کی اور سیکیورٹی فورسز کی مؤثر کارروائی پر فورسز کو خراج تحسین پیش کیا ہے۔

صدر مملکت نے جعفر ایکسپریس کے مسافروں کو ریسکیو کرنے پر فورسز کی بہادری کی تعریف کی اور کہا کہ نہتے شہریوں اور مسافروں پر حملے غیرانسانی اور مذموم عمل ہے۔

انہوں نے مزید کہا کہ مسافروں پر حملے کرنے والے بلوچستان اور اس کی روایات کے خلاف ہیں، کوئی مذہب اور معاشرہ ایسی گھناؤنی کارروائیوں کی اجازت نہیں دیتا۔

دوسری جانب وزیراعظم محمد شہباز شریف نے بھی جعفر ایکسپریس پر بزدلانہ حملے کی مذمت کرتے ہوئے کہا کہ فورسز کے جوان پیشہ ورانہ مہارت سے دہشت گردوں کا سدباب کررہے ہیں، دشوار راستوں کے باوجود فورسز کے جوانوں کے حوصلے بلند ہیں۔

انہوں نے کہا کہ فورسز بہادری سے بزدل دہشت گردوں کو پسپائی کی جانب دھکیل رہی ہیں، سیکیورٹی فورسز کے افسران واہلکار بہت جلد آپریشن میں کامیاب ہوں گے، سیکیورٹی فورسز بزدل دہشت گردوں کو انجام تک پہنچائے گی۔

وزیراعظم کا کہنا تھا کہ بزدلانہ حملہ کرنے والے حیوان صفت دہشت گرد کسی رعایت کے مستحق نہیں، دہشت گرد بلوچستان کی ترقی کے دشمن ہیں، دہشت گردوں کا دین اسلام، پاکستان اور بلوچستان سے کوئی تعلق نہیں۔

شہباز شریف نے کہا کہ دہشت گردی کے ملک سے مکمل خاتمے تک جنگ جاری رکھیں گے، پاکستان میں بدامنی وانتشار پھیلانے والی ہر سازش کو ناکام بنائیں گے۔

 انہوں نے مزید کہا کہ ملک دشمن عناصر کے ناپاک عزائم کو کبھی کامیاب نہیں ہونے دیں گے، دہشت گردی کے خلاف جنگ میں پوری قوم فورسز کے شانہ بشانہ ہے۔