وزیر اعظم شہباز شریف کی زیر صدارت وفاقی کابینہ کا اہم اجلاس آج صبح 11 بجے ہوگا، جس میں ملکی سیاسی و معاشی صورتحال سمیت مختلف اہم امور پر غور کیا جائے گا۔

وفاقی کابینہ کے ایجنڈے میں 12 نکات شامل ہیں، جن پر تفصیلی بحث کی جائے گی۔

کابینہ پاکستان آرڈیننس فیکٹری اور ہیوی انڈسٹریز ٹیکسلا بورڈ کے ممبران کی تقرری کی منظوری دے گی۔ اس کے علاوہ، بین الاقوامی تنازعات کے حل کے لیے کنونشن پر دستخط کی منظوری بھی ایجنڈے میں شامل ہے۔

کابینہ پاکستان اور ہنگری کی وزارت خارجہ و تجارت کے درمیان معاہدے پر دستخط کرنے کی منظوری بھی دے گی، جب کہ وزارت صنعت و پیداوار اور بین الاقوامی مالیاتی کارپوریشن کے درمیان ای-موبلٹی پر تعاون کے معاہدے پر بھی دستخط کیے جائیں گے۔

اسلام آباد ہائی کورٹ کی ہدایات کے حوالے سے وزارت داخلہ کی سمری کی منظوری، وسل بلوئر پروٹیکشن اینڈ ویجیلنس کمیشن ایکٹ، 2025 پر غور، اور چیئرمین پاکستان ٹوبیکو بورڈ (PTB) کے اضافی چارج سے متعلق فیصلے پر بھی کابینہ غور کرے گی۔

کابینہ کی جانب سے وسائل کی نقل و حرکت اور استعمال میں بہتری کے پروگرام کی پالیسی اور پروگرام ٹو کی تکمیل پر بھی بحث کی جائے گی۔

اس کے ساتھ ساتھ، انکم ٹیکس ترمیمی بل، 2025 کے ذریعے کل وقتی اساتذہ اور محققین کی آمدنی پر ٹیکس چھوٹ کی بحالی کی منظوری بھی ایجنڈے میں شامل ہے۔

11 مارچ کو ہونے والے کابینہ کمیٹی برائے نجکاری کے فیصلوں کی توثیق اور اقتصادی رابطہ کمیٹی کے 13 اور 21 مارچ کو ہونے والے اجلاس کے فیصلوں کی توثیق بھی ایجنڈے میں شامل ہیں۔