راولپنڈی: سیکیورٹی فورسز نے بنوں کینٹ پر خارجیوں کی جانب سے دہشت گرد حملے کی کوشش کو ناکام بنادیا۔

پاک فوج کے شعبہ تعلقات عامہ (آئی ایس پی آر) کے مطابق بنوں کینٹ پر خارجیوں کی جانب سے دہشت گرد حملے کی کوشش کی گئی جب کہ پہلے سے چوکس بہادر سیکیورٹی فورسز نے دہشت گردوں کا حملہ ناکام بنادیا۔

آئی ایس پی آر کا کہنا ہے کہ عزائم ناکام ہونے پر مایوس حملہ آور خارجیوں نے بارودی مواد سے لدی 2 گاڑیاں بیرونی دیوار سے ٹکرا دیں۔ بہادر سپاہیوں نے بے مثال ہمت اور پیشہ ورانہ مہارت کا مظاہرہ کرتے ہوئے حملہ آور خارجیوں کو نشانہ بنایا۔

ترجمان پاک فوج نے بتایا کہ سیکیورٹی فورسز نے جوابی کارروائی میں 4 خودکش بمباروں سمیت تمام 16 دہشت گردوں کو ہلاک کردیا جب کہ شدید فائرنگ کے تبادلے میں 5 بہادر سپاہیوں نے فرض کی انجام دہی کے دوران شہادت کا درجہ حاصل کیا۔

پاک فوج کے شعبہ تعلقات عامہ کا کہنا تھا کہ خودکش دھماکوں کے نتیجے میں بیرونی دیوار جزوی طور پر گرگئی اور دھماکوں سے قریبی انفراسٹرکچر کو بھی نقصان پہنچا۔

ترجمان نے کہا کہ خارجیوں کے خودکش حملے میں افسوس ناک طور پر قریبی مسجد اور ایک شہری رہائشی عمارت کو بھی شدید نقصان کا سامنا کرنا پڑا ہے جب کہ خارجیوں کے حملے کے نتیجے میں 13 معصوم شہری شہید اور 32 زخمی ہوگئے ہیں۔

آئی ایس پی آر کا مزید کہنا ہے کہ انٹیلی جنس رپورٹس میں وحشیانہ کارروائی میں افغان شہریوں کی جسمانی ملوث ہونے کی واضح تصدیق ہوئی ہے۔ انٹیلی جنس رپورٹس میں یہ بات بھی سامنے آئی ہے کہ بنوں کینٹ پر حملہ افغانستان میں موجود خوارج کے رہنماؤں کی ہدایت پر کیا گیا ہے۔

ترجمان پاک فوج نے کہا کہ پاکستان افغان عبوری حکومت سے توقع رکھتا ہے کہ وہ اپنی ذمہ داریوں کو پورا کرے گی اور توقع ہے کہ افغان عبوری حکومت پاکستان کے خلاف دہشت گردی کی سرگرمیوں کے لیے اپنی زمین کو استعمال ہونے سے روکے گی۔

آئی ایس پی آر نے واضح کیا کہ پاکستان سرحد پار سے آنے والے خطرات کے جواب میں ضروری اقدامات کرنے کا حق محفوظ رکھتا ہے، پاکستان کی سیکیورٹی فورسز ہر قسم کے دہشت گردی کے خاتمے کے لیے غیر متزلزل عزم رکھتی ہیں۔

پاک فوج کے شعبہ تعلقات عامہ کا مزید بتانا تھا کہ بہادر سپاہیوں اور معصوم شہریوں کی قربانیاں ہمارے عزم کو مزید مضبوط کرتی ہیں، پاکستان کی سیکیورٹی فورسز ہر قیمت پر اپنے ملک کی حفاظت کو یقینی بنائیں گی۔