اسلام آباد: حریت رہنما یاسین ملک کی اہلیہ مشعال ملک نے یوم خواتین پر درد بھرا پیغام دیتے ہوئے کہا کہ کشمیر کی مظلوم خواتین کو انصاف ملنا چاہیے۔

یوم خواتین کے موقع پر حریت رہنما یاسین ملک کی اہلیہ مشعال ملک نے مظلوم کشمیری خواتین کے لیے آواز بلند کرتے ہوئے کہا کہ آج جب دنیا خواتین کا دن منا رہی ہے، تو ان کے سامنے مقبوضہ کشمیر کی مظلوم اور لاچار خواتین کی تصویر بھی ہونی چاہیے۔

مشعال ملک نے کہا کہ مقبوضہ کشمیر کی خواتین نے آزادی کے لیے اپنی زندگیوں کا بیش بہا حصہ قربان کیا ہے اور یہی خواتین ہماری قوم کی ہیرو ہیں۔

ان کا کہنا تھا کہ دنیا کو آج خواتین کے عالمی دن پر مقبوضہ کشمیر کی خواتین کو نہیں بھولنا چاہیے۔ جہاں دنیا میں خواتین کے کارناموں کی بات ہو رہی ہے وہیں مقبوضہ کشمیر کی مظلوم خواتین بھی توجہ کی مستحق ہیں جنہوں نے ہزاروں قربانیاں دیں۔

مشعال ملک نے اس بات پر بھی زور دیا کہ ہزاروں خواتین اپنی زندگی سے ہاتھ دھو بیٹھی ہیں، ہزاروں کے سہاگ اجڑ چکے ہیں اور لاکھوں کی عزتیں قربان ہو چکیں۔

انہوں نے عالمی برادری کو مخاطب کرتے ہوئے کہا کہ درندگی کا شکار بننے والی بیٹیاں اور مائیں دنیا کے سامنے ہیں اور ان خواتین کی حالت پر بات نہ کرنا عالمی برادری کے منہ پر طمانچہ ہے۔

مشعال ملک نے مزید کہا کہ دنیا میں حقوق کے دن منائے جاتے ہیں مگر کیا مقبوضہ کشمیر کی خواتین دنیا کا حصہ نہیں ہیں؟۔