چئیرمین جوائنٹ چیفس آف سٹاف کمیٹی اور تینوں سروسز چیفس نے پاکستانیوں کو عیدالفطر کی دلی مبارکباد دی ہے۔

پاک فوج کے شعبہ تعلقات عامہ (آئی ایس پی آر) کے مطابق چئیرمین جوائنٹ چیفس آف سٹاف کمیٹی اور تینوں سروسز چیفس کا کہنا ہے کہ رمضان المبارک کی تکمیل پر عید الفطر اتحاد،تشکر اور احساس و ہمدردی کی علامت ہے۔

 ان کا کہنا تھا کہ فوجی جوانوں کے لیے عید کی حقیقی روح اس اعزاز میں پنہاں ہے کہ وہ اپنے خاندانوں سے دور رہ کر بھی مادرِ وطن کے دفاع کے لیے ہمہ وقت تیار ہیں۔

 آئی ایس پی آر کے مطابق مادر اعلیٰ عسکری چیفس کا کہنا ہے کہ وطن کے دفاع پر مامور جوان ملک میں امن، خوشحالی اور ہم آہنگی کے فروغ کے لیے کوشاں ہیں، یہ بابرکت موقع ہمیں اپنے قومی ہیروز کی بے مثال بہادری اور عزم پر غور کرنے کا موقع فراہم کرتا ہے۔

وہ بہادر مرد و خواتین جو ہماری آزادی اور خودمختاری کی حفاظت کے لیے ہمیشہ مستعد رہتے ہیں، مسلح افواج ان جری سپاہیوں کی قربانیوں اور ان کے اہلِ خانہ کے غیر متزلزل تعاون کی دل سے قدر کرتی ہے۔

آئی ایس پی آر کا مزید کہنا تھا کہ عید کی پرمسرت گھڑی میں، مسلح افواج تمام شہریوں سے اپیل کرتی ہیں کہ وہ محبت، احترام اور یکجہتی کی علامت اس پرچم تلے متحد ہو جائیں، جو ہمارے عظیم وطن کی پہچان ہے