اسلام آباد: سوشل میڈیا پر منفی پروپیگنڈے کے معاملے میں جے آئی ٹی نے پاکستان تحریک انصاف (پی ٹی آئی) کے 16 افراد کو دوبارہ طلب کرلیا۔

ذرائع کے مطابق جے آئی ٹی نے سوشل میڈیا پر منفی پروپیگنڈے کے معاملے میں پی ٹی آئی کے 16 افراد کو 18 مارچ 2025 کو پیش ہونے کے نوٹس جاری کیے ہیں۔

جن 16 افراد کو طلب کیا گیا ہے ان میں سید فردوس شمیم نقوی، محمد خالد خورشید خان، میاں محمد اسلم اقبال، محمد حماد اظہر اور عون عباس شامل ہیں۔

علاوہ ازیں جے آئی ٹی نے محمد شہباز شبیر، وقاص اکرم، تیمور سلیم خان، صبغت اللہ ورک، اظہر مشوانی، محمد نعمان افضل، جبران الیاس، سلمان رضا، ذلفی بخاری، موسیٰ ورک اور علی ملک کو طلب کیا ہے۔

ذرائع کا کہنا ہے کہ پی ٹی آئی کے بیرسٹر گوہر رؤف حسن اور شاہ فرمان پہلے ہی جے آئی ٹی کے سامنے پیش ہوچکے ہیں جب کہ 14 مارچ 2025 کو بانی پی ٹی آئی کی بہن علیمہ خان طلبی کے باوجود پیش نہیں ہوسکیں۔

جے آئی ٹی نے علیمہ خان کو 19 مارچ 2025 کو دوبارہ طلبی کا نوٹس جاری کردیا ہے، جے آئی ٹی ان تمام افراد سے شواہد کی روشنی میں تحقیقات کر رہی ہے اور ان کے خلاف تحقیقات ریاست مخالف پروپیگنڈے کے حوالے سے کی جا رہی ہیں۔

یاد رہے کہ جے آئی ٹی کو الیکٹرانک جرائم کی روک تھام ایکٹ 2016 کے سیکشن 30 کے تحت تشکیل دیا گیا تھا اور اس کی سربراہی انسپکٹر جنرل آف پولیس اسلام آباد کر رہے ہیں۔

نوٹسز میں تمام افراد کو متنبہ کیا گیا ہے کہ وہ اس معاملے پر اپنی پوزیشن کی وضاحت کریں۔