اسلام آباد: وزیرِ اعظم شہباز شریف نے ذخیرہ اندوزوں اور مصنوعی چینی قلت پیدا کرنے والوں کے خلاف سخت کارروائی کی ہدایت کردی۔

آج اسلام آباد میں وزیرِ اعظم کی زیرِ صدارت چینی کی کھپت و رسد اور قیمتوں پر عوام کو فراہمی کے حوالے سے ایک جائزہ اجلاس منعقد ہوا۔

اجلاس میں وفاقی وزراء اور چاروں صوبوں کے چیف سیکرٹریز نے ویڈیو لنک کے ذریعے شرکت کی جب کہ اجلاس میں وزیرِ اعظم کو چینی کی موجودہ قیمتوں، رسد اور کھپت کے حوالے سے تفصیلی آگاہی فراہم کی گئی۔

وزیرِ اعظم محمد شہباز شریف نے چینی ذخیرہ اندوزوں اور مصنوعی طور پر چینی کی قلت پیدا کرنے کے ذمہ دار عناصر کے خلاف سخت ترین کارروائی کرنے کی ہدایت کی۔

وزیرِ اعظم نے کہا کہ چینی ذخیرہ کرنے اور قیمتوں میں مصنوعی اضافے کی کسی کو ہرگز اجازت نہیں دی جائے گی۔

انہوں نے ناجائز منافع خوروں اور ذخیرہ اندوزوں کے خلاف کریک ڈاؤن کرنے کی ہدایت دیتے ہوئے کہا کہ متعلقہ حکام چینی کی کھپت اور رسد پر کڑی نظر رکھیں۔

شہباز شریف کا کہنا تھا کہ ملک میں چینی کی وافر مقدار موجود ہے اور کسی کو بحران پیدا کرنے کی اجازت نہیں دی جائے گی۔

انہوں نے کہا کہ رمضان المبارک کے مہینے میں عوام کا استحصال برداشت نہیں کیا جائے گا اور اس سلسلے میں چاروں صوبوں کے چیف سیکرٹریز کو چینی کی مقررہ قیمت پر عوام کو فراہمی یقینی بنانے کی بھی ہدایت دی۔